Атырау қаласы маңындағы «Қайыршақты» ауылдық округіндегі «Абдулла» шаруа қожалығындағы 15 ірі қарадан қотыр ауруы анықталды. Шаруа қожалығының өкілі Нұрбек Есенқұлов бұл ақпаратты растады.
«Соколок» су арнасының бойында орналасқан қожалықта 105 сиыр бар.
«Қожалықтағы малдан қотыр ауруы былтырғы қазан, қараша айларында анықталды. Қателеспесем, 20-ға жуық сиыр ауырды. Ветеринар мамандарды шақыртып, екпе алдырдық. Ауру сәл бәсеңсігендей болғанымен, сол уақыттан бері толық жойылмай отыр», — дейді Нұрбек Есенқұлов.
Шаруалар аурудың шығу себебін ағысы тоқтаған канал суының әсерінен көреді. Дегенмен ветеринариялық бақылау және қадағалау комитетінің Атырау облыстық аумақтық инспекциясы бұл болжамды жоққа шығарып отыр.
Облыстық аумақтық инспекцияның басшысы Нұржан Үсенбаевтың айтуынша, «Абдулла» шаруа қожалығындағы сиырлардан сынама алынды. Сынама нәтижесі лабораториялық тексерістен кейін анықталады.
«Дегенмен, қотыр қауіпті инфекция болып есептелмейді. Жаппай эпидемия немесе қатерлі инфекция белгілері анықталған жоқ. Қазіргі уақытта ветеринар мамандар емдеу жұмыстарын жүргізуде», — деді маман.
Атырауда бұған дейін мал арасында жаппай қотыр ауруының тіркелгені туралы нақты деректер жоқ.
Дегенмен 2024 жылдың шілде айында облыстың Индер және Құрманғазы аудандарында бруцеллез ауруы тіркелген болатын. Бұл ауру 450 бас малдан анықталған еді. Оның ішінде 167 сиыр, 278 қой және 5 түйе бар. Ауру жануарлар арнайы ет өңдеу цехтарына жіберіліп, иелеріне өтемақы төленді.
Сурет: Pixabay.com
