2024 жылы 1 қарашадағы жағдай бойынша, Қазақстан азаматтары елдегі банктерде 5,3 трлн теңге шетел валютасымен сақтаған. Бұл көрсеткіш жыл бойы аса өзгермеген, тек жыл басынан бері 3%-ға төмендеген.
Ranking.kz талдауына сәйкес, халық шетел валютасымен қаржыны ең көп Bereke Bank-те сақтаған. Салымдар бірден 30,2%-ға, 65,5 млрд теңгеге дейін артқан. Банк тек шетел валютасындағы салымдарда ғана емес, барлық депозит түрі бойынша үздік нәтиже көрсетіп отыр. Екінші қатарда шетел валютасындағы салымдар көлемін 3%-ға ұлғайтқан Банк ЦентрКредит тұр. Jusan Bank 1,9%-дық өсіммен үздік үштікті түйіндеді.
Ал қалған ірі банктерде керісінше бұл сегмент бойынша теріс динамика байқалды.
Халықтың шетел валютасындағы салымдарының динамикасына бірнеше фактор әсер етеді. Біріншіден, шетел валютасындағы депозиттер көбіне табыс табу емес, жинақтау үшін қолданылады. Сондықтан азаматтар өнімнің тиімділігіне емес, қаржы институтына деген сенімге көбірек назар аударады. Екіншіден, салымдар көлемі ұлттық валюта бағамының өзгеруіне және халықтың болашақтағы бағам туралы болжамдарына тәуелді.
Биыл ұлттық валюта бағамының құнсыздану халықты біраз алаңдатты. 2024 жылғы 22 желтоқсандағы жағдай бойынша АҚШ долларының бағамы 523 теңге болды. Бұл жыл басынан бері теңгенің 15,4%-ға (70 теңгеге жуық) әлсірегенін көрсетеді. Ұлттық валютаның құнсыздануы халықтың шетел валютасындағы салымдарға деген қызығушылығын төмендеткенімен, жинақтау құралдарына сұраныс артқан.
Халықтың шетел валютасы бойынша салымдарының динамикасы банктерге деген сеніміне, нарықтағы жағдайға және ұлттық валюта бағамының тұрақтылығына байланысты болады. Бұл ретте тұтынушының шешіміне валюта бағамы ғана емес, қаржы институттарының беделі де маңызды.
Сурет: istockphoto.com
