Алдын ала ақпаратқа сәйкес, Көлік министрлігінің хабарлауынша, Azerbaijan Airlines әуе компаниясының жолаушылар ұшағында 37 Әзірбайжан, 6 Қазақстан, 3 Қырғызстан, 16 РФ азаматы болған. Бүгін Ақтау қаласының маңында Баку-Грозный № J2-8243 рейсін орындау кезінде ұшақ құлады.
Маңғыстау облысының денсаулық сақтау басқармасының мәліметінше, Қазақстанда апатқа ұшыраған ұшақтың бортында баллон жарылған.
«25 желтоқсан күні сағат 10:58-де бірінші санатты жедел шақырту түсті. Ұшақтың бортында баллон жарылған», – делінген хабарламада.
Баку қаласынан Грозныйға бағыт алған ұшақ Ақтау қаласынан бірнеше шақырым жерде құлады. Алдын ала деректер бойынша, ұшақ құстарға соғылған.
Төтенше жағдайлар министрлігінің хабарлауынша, ұшақ апатынан 25 адам аман қалған. Оның ішінде 22 жолаушы түрлі жарақатпен ауруханаға жеткізілсе, 5 адамның жағдайы ауыр. Зардап шеккендердің ішінде 11-16 жастағы балалар бар.
Әуе кемесінде болған жолаушылардың толық аты-жөні жарияланды.
Тоқаев тапсырмасымен мемлекеттік комиссия құрылды. Комиссияға вице-премьер Қанат Бозымбаев жетекшілік етеді. Президент дәрігерлерді Астанадан Ақтауға жедел жеткізуді бұйырды.
Сурет: Ашық дереккөздерден
