Бүгін, 28 қарашада, теңгенің айырбас бағамы АҚШ доллары үшін 518-519 теңге аралығында саудаланып жатыр. Орташа сараланған бағамы — 512 теңге. Бұл ұлттық валютаның 2,4%-ға әлсірегенін көрсетеді. Бұл туралы Ұлттық банк хабарлады.
Ұлттық банктің мәліметінше, теңгеге әсер еткен сыртқы факторлар:
- АҚШ долларының жаһандық нығаюы:
DXY индексі (АҚШ долларының негізгі валюталарға қатысты бағамы) қараша айында 2,2%-ға өсіп, 106,2 пунктке жетті. Бұл дамушы елдердің валюталарына қысым. - Шикізат құнының өзгеруі:
Мұнай бағасының құбылуы және АҚШ-тың мұнай экспортының артуы жөніндегі болжамдар шикізат нарығында тұрақсыздық туғызып отыр. - Ресей рублінің әлсіреуі:
Ресей Федерациясына қарсы санкциялардың енгізілуі рубльдің құнсыздануына әкелді. Ай басынан рубльдің долларға қатысты бағамы 18%-ға әлсіреді, бұл Қазақстанның негізгі сауда серіктестерінің валютасына қысым жасап жатыр.
Ал әсер еткен ішкі факторларға шетел валютасына сұраныстың артуы мен психологиялық қысым себеп дейді.
- Шетел валютасына сұраныстың артуы:
Экономикалық агенттер тарапынан доллар сатып алу белсенділігі байқалады. Қараша айында күнделікті сауда-саттық көлемі 238 млн долларды құрап, өткен жылмен салыстырғанда 1,5 есеге артқан. - Психологиялық қысым:
Теңгенің 500 теңге деңгейінен асып кетуі психологиялық факторларға әсер етіп, нарықта алып-сатарлықты арттырды.
Қазір Ұлттық Банк теңгенің айырбас бағамын тұрақтандыру мақсатында валюталық интервенция жүргізіп, нарықтағы шетел валютасы ұсынысын қамтамасыз ету үшін жағдай жасап жатыр.
Осыған дейін долларға сұраныс артып, баға өсіп жатқанын жазған едік.
Сурет: Kazinform/ Pixabay
