Бүгін, 17 қарашада Батыс Қазақстан облысындағы Жаңақала ауданының Қызылоба ауылы маңында жол-көлік апатынан 8 адам қаза болды. Бұл туралы куәгерлер әлеуметтік желіде хабарлады.
Қайғылы оқиға салдарынан тағы 4 адам ауруханаға жеткізілді. Toyota Camry мен Volkswagen Sharan маркалы көліктердің біреуі толықтай өртеніп кеткен. Екі машина да Жаңақала ауданында жолаушы тасымалдайтын таксилер.
Облыстық денсаулық сақтау басқармасының баспасөз хатшысы Аружан Ғайнолла 4 науқастың да жағдайы орташа екенін хабарлады.
«Жарақат алған азаматтар Ақжайық аудандық ауруханасына жеткізілді. Қазір олар медициналық тексеруден өтіп, ем қабылдап жатыр», — деп мәлімдеді басқарма өкілі.
БҚО ішкі істер департаментінің ресми өкілі Нұржан Қуанғали апатқа қатысты мәлімдеме жасады.
«Бұл дерек бойынша қылмыстық іс қозғалды. Алдын ала болжам бойынша жүргізушілердің бірі қарсы бағытқа шығып кеткен болуы мүмкін», — деді Н. Қуанғали.
23 қазанда Ақтөбе облысында Самара – Шымкент автожолында жүк көлігі мен жолаушылар тасымалдаумен айналысатын «ГАЗель» көлігі соқтығысты. Апат салдарынан 12 адам қаза тапты.
фото: Ж. Нигметов/Facebook
