Бүгін Алматыда Нұрсұлтан Назарбаевтың бұрынғы келіні Гүлмира Сатыбалдыға қатысты сот үкімі шықты.
Сот шешімі бойынша Гүлмира Сатыбалды 12 жылға, көлік жүргізушісі Мәди Батыршаев тоғыз жылға бас бостандығынан айырылды.
Гүлмира Сатыбалдыға Қылмыстық кодекстің 126-бабы 3-бөлігі 3-тармағы (Бас бостандығынан заңсыз айыру), 389-бабы 4-бөлігі (Өзінше билік ету), 194-бабы 4-бөлігі 2-тармағы (Қорқытып алу) бойынша айып тағылды.
Осыған дейін жарыссөз барысында мемлекеттік айыптаушы Гүлмира Сатыбалдыны 13 жылға соттауды сұраған еді.
Оның көлік жүргізушісі Мәди Батырашевқа Қылмыстық кодекстің 126-бабы 3-бөлігі 3-тармағы (Бас бостандығынан заңсыз айыру) айып тағылды.
Гүлмира Сатыбалды мен Мәди Батыршаев Сатыбалдының күйеу баласы әрі бизнес серіктесі Абай Жүнісовті 165 күн қамауда ұстады деп айыпталды.
Сотта Абай Жүнісовтің 165 тәулік қамауда болғаны, сол уақытта сотталушы Сатыбалдының қорқыту арқылы жәбірленушінің және оның жақын туыстарының ақшалай қаражаты мен мүлкін иемденгені анықталды.
Сонымен қатар Гүлмира Сатыбалды жәбірленушіні өзімен аффилиирленген үшінші тұлғаларға мүлік және жарияланған акцияларға құқығын қайта тіркеуге мәжбүрлеп, 1,2 млрд теңге материалдық залал келтірген.
Сот үкімімен Гүлмира Сатыбалды жәбірленуші Абай Жүнісовке 2,6 млрд теңге материалдық, 10 млн теңге моральдық шығын төлейді.
Үкім заңды күшіне енген жоқ.
Айта өтейік, Гүлмира Сатыбалды – Қазақстанның Тұңғыш президенті Нұрсұлтан Назарбаевтың немере інісі Қайрат Сатыбалдының бұрынғы әйелі.
Қайрат Сатыбалды 2022 жылы наурыз айында қамауға алынды. Кейін «Қазақтелеком» мен «Көлік сервис орталығы» компанияларынан ақша жымқырды деген айыппен сотталды.
Жыл басында билік оның мемлекетке 650 млрд теңгені қайтарғанын хабарлады.
Жуырда оған қатысты бас бостандығынан айыру орнындағы мерзім бостандықты шектеуге ауыстырылды.
Өз өтінішінде Қайрат Сатыбалды келтірілген залалды өтегенін мәлімдеген.
Сот оның өтінішін қанағаттандырып, бас бостандығынан айыру жазасының өтелмеген бөлігін 3 жыл 3 ай 7 күн мерзімге ауыстырды.
Ол пробациялық бақылауға алынды.
Сурет: видеодан скриншот / 24.kz
