Sarapshy.info ақпарат агенттігі киік жайлы шешім журналистикасы жанрында материал жариялап, оны Экология және табиғи ресурстар министрлігіне жолдады.
6 ақпан күні «Sarapshy.info» ақпарат агенттінің бас редакторы Нұрлыбек Рахманов бұл журналистік жұмыстағы киікке қатысты түрлі тараптың ой-пікірінен шығатын төмендегідей сұрақтарға жауап сұрап Экология және табиғи ресурстар министрлігіне хат жолдап еді.
- Сарапшылар киіктер күйекке түсетін мезгілде атуға, аулауға болмайтынын айтты. Ескересіздер ме?
- Не себепті киіктер буаз күйінде атуға рұқсат берілді?
Кеше министрліктен жауап келді. Вице-министр Н.Шәрбиевтің қолы қойылған жауапта былай делінген:
«Қазақстан Республикасының «Жануарлар дүниесiн қорғау, өсiмiн молайту және пайдалану туралы» Заңының 45 бабында жануарлар түрлерінің санын реттеу биологиялық негіздемеге сәйкес жүргізіледі делінген. Осыған орай, Министрлік халқаралық сарапшылардың ұсынымдарын, сондай-ақ Қазақстандағы киіктерді аулаудың тарихи тәжірибесін ескере отырып, Жәңгір хан атындағы Батыс Қазақстан аграрлық-техникалық университетінің киіктердің популяциясын басқару жөніндегі биологиялық негіздемесі әзірленді.
Бүгінгі күні киіктер тұяқты жануарлардың ең көп таралған түрі болып табылады. Салыстыратын болсақ Қазақстандағы барлық басқа тұйяқты жануарлардың жалпы саны 200,0 мыңнан аспайды. Мәселен елік жануардың саны 95,5 мыңнан аспайды. Бұл ретте, жыл сайын аң аулау объектілері болып табылатын тұяқты жануарлар түрлерінің (қоңыр аю, сібір елігі, марал, асқан бұғысы, бұлан, сібір тау ешкісі) осы жануарлардың есептелген санының 10-нан 40% дейін аулауға, сондай-ақ аналықтарында эмбриондардың басында болуы мұндай аң аулауға рұқсат етіледі. Бұл өз кезегінде аң аулау мерзімдері биологиялық негізінде аңтанушымен анықталып, ғылыми-техникалық кеңесімен бекітіледі. Бұл тәсіл бүкіл әлемде қолданып келеді, ал егерде (эмбрион) үлкен болса, онда аңшылық тоқтатылады.
Қазақстанның ғылыми қоғамдастығының, халықаралық сарапшылардың ұсыныстарын және қолайсыз ауа райы жағдайларын ескере отырып, Министрлік ағымдағы жылдың 10 ақпанынан бастап киіктердің санын реттеу бойынша жұмыстарды тоқтату туралы шешім қабылданды».
Еске сала кетсек, Экология министрлігі өткен күзде 337 мың киікті аулау мен атуды ұсынды. Жоспар орындалмағасын қыста да атуға рұқсат берген болатын. Жоғарыдағы репортаждан түрлі тараптың − жергілікті тұрғындар мен билік, фермерлер, ақбөкенге қатысы бар ұйым өкілдері мен ғалымдардың киік мәселесіне қатысты қандай шешімді құп көретінін біле аласыз.
sarapshy.info
