Елімізде ең аз жалақы мөлшерін 200 мың теңгеге дейін арттыру туралы петиция пайда болды. Бұл туралы бастаманың авторы Диас Абайұлы gosrating.com сайтында хабарлады.
Автордың айтуынша, көршілес Түркіменстанда ең төменгі жалақы шамамен 200 мың теңгеге тең, Балтық елдерінде 500 мыңнан 600 мың теңгеге жетеді, ал Эквадорда 270 мың теңге шамасында.
2025 жылы елімізде ең төменгі жалақы мөлшерлемесі 85000 теңге болып бекітілді. Бұл көрсеткіш 2024 жылдан бері өзгеріссіз қалды. Қаржы министрі Мәди Тәкиевтің сөзіне сүйенсек, елімізде ең аз жалақы деңгейі 90 мың теңге болуы керек.
«Елдегі жағдайды ескере отырып, жалақыны қазіргі қалпында қалдыруды жөн көрдік», – деді министр үкіметтің баспасөз отырысында.
«Іс жүзінде 85 000 теңге отбасын асырауға, азық-түлік пен негізгі қажеттіліктерді қамтамасыз етуге жетпейді. Әсіресе Алматы, Астана сияқты ірі қалаларда. Тіпті Тараз сияқты облыс орталықтарында да бұл сома аздық етеді», – дейді Диас Абайұлы.
Қазір петиция 1629 дауыс жинап отыр, ал 11 адам жалақы мөлшерінің көтерілуіне қарсылық білдірген.
Естеріңізге сала кетейік, 2025 жылдың алғашқы үш айында елімізде орташа номиналды жалақы 423,1 мың теңгені құрады. Ең жоғары жалақы Атырау (634,2 мың теңге), Маңғыстау (621,3 мың теңге) және Ұлытау (599 мың теңге) облыстарында тіркелді. Ал БҚО-да жалақы индексі 5,2%-ға төмендеп, өңір жалақы өсімі өте төмен аймақтардың көшін бастады.
фото: gov.kz
