Батыс Қазақстан облысы 2025 жылдың алғашқы үш айында жалақы өсімі өте төмен аймақтардың көшін бастады. Бұл туралы Ranking.kz Стратегиялық жоспарлау және реформалау агенттігінің деректеріне сүйеніп хабарлады.
Есепке сәйкес, өңірде жалақы индексі 5,2%-ға төмендеген. Бұл тұрғындардың сатып алу қабілетінің айтарлықтай әлсірегенін білдіреді. Яғни жалақы көлемі өткен жылмен салыстырғанда өссе де, бағаның қымбаттауы оны толық өтей алмады.
Батыс Қазақстан облысында жарты жылда тұтыну тауарлары 11,1%-ға қымбаттаған.
Атырау, Шығыс Қазақстан, Қызылорда, Ақмола және Маңғыстау облыстарында тұрғындардың сатып алу қабілетінің әлсірегені байқалады.
Еліміз бойынша орташа номиналды жалақы 423,1 мың теңгені құрады, бұл өткен жылдың сәйкес кезеңімен салыстырғанда 9,2%-ға жоғары. Ең жоғары жалақы Атырау (634,2 мың тг), Маңғыстау (621,3 мың тг) және Ұлытау (599 мың тг) облыстарында тіркелді, ал ең төменгі көрсеткіш Солтүстік Қазақстан (300,1 мың тг), Жетісу (308,4 мың тг) және Жамбыл (308,9 мың тг) облыстарына тиесілі.
2024 жылы Velocity Global порталы Қазақстанды ең төменгі жалақы деңгейі бойынша әлемнің 10 елінің қатарына енгізді.
фото: gov.kz
