Ресейдің жаңа талаптарына байланысты Қазақстан мұнайының Қара теңіз арқылы тасымалына шектеу қойылды. Бұл туралы Reuters агенттігі хабарлады.
Владимир Путин бұл жарлыққа Еуроодақтың 18-санкциясы жарияланғаннан кейін бірден қол қойды.
Басылым деректеріне сүйенсек, Ресей билігі шетелдік танкерлердің Қара теңіз порттарына кіруі үшін федералдық қауіпсіздік қызметінен (ФСБ) рұқсат алуды міндеттеген.
Бұл шектеулердің салдарынан Каспий құбыр консорциумы (CPC) арқылы Новороссийск портына жеткізілетін қазақстан мұнайының экспорты уақытша тоқтатылды. Аталған порт арқылы еліміздің мұнай экспортының 80%-дан астамы жүзеге асып келген.
Тамыз айында CPC терминалы арқылы тәулігіне 1,66 млн баррель мұнай экспорттау жоспарланған болатын.
Ресей Көлік министрлігі жағдайға қатысты ресми түсініктеме берген жоқ, алайда дереккөздер мәселе алдағы күндері шешілуі мүмкін екенін жоққа шығармайды.
Мұнай өндірісі бойынша сарапшы Олжас Байдильдинов бұл шектеу Қазақстанның мұнай экспортына әсер етпейтінін айтты.
«Путиннің жарлығына сәйкес, енді шетелдік кемелердің Қара теңіз порттарына кіруі үшін федеральді қауіпсіздік қызметінің рұқсаты қажет. Барлық шетелдік мұнай танкерлері арнайы рәсімдеуден өтеді.
CPC терминалында және мұнай құбыры бойында шамамен 1 миллион тонна көлемінде мұнай сақтайтын қоймалар бар. Бұл жүйе бізге бір апта көлемінде тұрақты жұмыс істеуге мүмкіндік береді», — деді ол.
Энергетика министрлігі Ресей порттары арқылы мұнай экспорты жалғасады деп мәлімдеме жасады.
фото: freepik.com
