Жамбыл облысының Меркі ауданындағы «Нұрай» бөбекжай бақшасында балалар жаппай уланып, ауруханаға түсті. Бұл туралы Жамбыл облысы әкімдігі хабарлады.
17 наурыз күні 10 бала аудандық ауруханаға жеткізілген. Дәрігерлер 9 балаға жіті ішек инфекциясы, 1 балаға энтеровирусты инфекция диагнозын қойған. Ауыр жағдайда түскен бір бала жансақтау бөліміне ауыстырылған. Әкімдік баланың жағдайы тұрақты екенін мәлімдеген.
Облыс әкімі Ербол Қарашөкеев улану себебін анықтау үшін арнайы жұмыс тобын құруды тапсырды. Балабақшада залалсыздандыру жұмыстары жүргізілді. Мекеме екі тәулікке жабылды, тексеру нәтижелері кейін хабарланады.
Жыл басынан бері елде мұндай оқиғалар жиіледі. Атап айтқанда, Ақтөбе облысында 23 оқушы тәтті тағамнан уланып, 9 оқушы ауруханаға түсті.
Наурыз айының басында Түркістан қаласындағы «Ямми Маки» дәмханасынан пицца, суши және чикен тағамын сатып алған 57 адам уланып, ауруханаға түсті.
Сурет: Pixabay
