Таяу Шығыстағы әскери қақтығыс эскалациясы аймағынан 3,3 мыңнан астам қазақстандық елге қайтарылды. Бұл жөнінде Сыртқы істер министрлігі хабарлады.
Министрлік мәліметінше, эвакуация басталғалы бері 12 арнайы әуе рейсі қатынап, 3300-ден астам азаматты Қазақстанға жеткізген.
Бүгін, 6 наурызда Ирандағы Қазақстан дипломатия өкілдіктері жеті азаматты Иран-Армения шекарасына жеткізуді жоспарлап отыр. Бұған дейін Тегеран мен Еревандағы дипломаттар Иранда қалған 34 азаматты автобуспен шекарадан өткізген. Ираннан Қазақстанға 52 адам қайтарылды.
Айта кетейік, 28 ақпанда Израиль мен АҚШ Иран астанасы Тегеран мен бірнеше өңірді соққылады. Соққыға жауап ретінде Иран Таяу Шығыс елдеріндегі АҚШ базаларына дрон арқылы шабуыл бастады.
5 наурызда Иран дроны Әзербайжан әуе кеңістігіне еніп, шабуыл салдарынан 2 адам жарақат алды.
