Франция президенті Эммануэль Макрон қыркүйекте БҰҰ Бас Ассамблеясында Палестина мемлекетінің тәуелсіздігін ресми түрде мойындайтынын мәлімдеді. Президент бұл шешімін Х әлеуметтік желісінде жариялады.
«Газадағы соғысты тоқтату мен бейбіт тұрғындарға көмек көрсетуге басымдық берілуі тиіс», — деп атап өтті ол.
Палестина автономиясы басшысының орынбасары Хусейн әл-Шейх Францияның бұл ұстанымын құптады. Ал ХАМАС қозғалысы Францияның уәдесін “қысым көріп отырған палестина халқына жасалған әділеттілік жолындағы оң қадам” деп атады.
Бүгінде Біріккен ұлттар ұйымының 193 мүшесінің 142-сі Палестинаны мойындаған не мойындауға ниетті.
АҚШ Мемлекеттік хатшысы Марко Рубио Макронның бұл жоспарын сынады. Оның айтуынша, бұл шешім ойланбай қабылданған.
Израильдің вице-премьері мен әділет министрінің қызметін атқаратын Ярив Левин болса, бұл қадамды “Франция тарихындағы қара дақ” және “терроризмді қолдау” деп атады.
Франция Еуропадағы еврей және мұсылман қауымы ең көп шоғырланған ел. Демек Таяу Шығыстағы жағдай бұл елдегі әлеуметтік тұрақтылыққа да әсер етуі мүмкін.
фото: Ludovic Marin/AP
