Қаңтар-қыркүйек айларында қазақстандықтар жалпы салмағы 2,1 мың кг болатын алтын құймаларын сатып алған. Бұл 2023 жылғы аталған кезеңімен салыстырғанда 90%-ға артық деуге болады. Сондай-ақ төрт жылдағы ең жоғары көрсеткіш.
ҚР Ұлттық банкінің мәліметінше, сұраныстың негізгі бөлігін (77%) алғашқы екі тоқсанның көрсеткіші құрады. Сонымен қатар екеуінікін де бірдей деуге болады: І тоқсанда – 816,4 кг, ІІ тоқсанда – 779,2 кг. Сәйкесінше, ІІІ тоқсанға тек 23% немесе 475,5 кг тиесілі.
«Соңғы нәтиже аз болып көрінгенімен, тарихи тұрғыдан алғанда олай емес. Егер тиісті көрсеткіштерді алтынның орташа тоқсандық бағасына көбейтсек, халықтың тоғыз ай ішінде қымбат металға салған инвестициясы 68,6 млрд теңге құрағанын көруге болады. Аталған сома өткен жылмен салыстырғанда номиналды түрде 2,2 есеге көп», – деп жазды Data Hub.
Ең қызығы, қазақстандықтар 50 граммдық құймаларға қызығушылық таныта бастаған сыңайлы. ІІІ тоқсанда аталған құймалардың сатылымы барлық сатылымның 40%-ын құрады, яғни, 5,5 мың дана болды.
Қазақстан алтын қорын көбейткен елдердің ондығына енді
Жақында кейінгі он жылда алтын сатып алуды арттырған елдердің тізімі жарияланды. Қазақстан алтын қорын көбейткен он елдің қатарына енді. 2023 жылы әлем елдерінің орталық банктері 1 037 тонна алтын сатып алған.
Соңғы он жылда алтын сатып алуды арттырған елдердің көш басында Ресей келеді. 2013-2023 жылдар аралығында көрші мемлекет 1 298 тонна алтын алған.
Қытай да алтын қорын біраз арттырған. Аспан асты елі 1 181 тонна алтын сатып алыпты. Үшінші орында – Түркия елі тұр. Бұл елдің алтын қоры 424 тонна алтынға толыққан.
Бұдан кейінгі орындарда Польша, Үндістан, Өзбекстан, Қазақстан, Сингапур, Ирак және Таиланд тұр.
Биыл алтынның бағасы ай сайын дерлік рекорд жаңартып, қыркүйекте 2,6 мың АҚШ долларды құрады. Қазан айының басында бағаның көтерілуі жалғасты және бір троя унциясы үшін 2,7 мың АҚШ долларға жетті.
Қазір біздің елде бір грамм алтынның құны 42 мың теңгеден асады.
Сурет: pixabay.com