Атыраулық Асқар Иманғалидың қарлығаштарға деген қамқорлығы тұтас ел-жұртты сүйсіндірді. Экобелсенді туралы мақала жариялап отырмыз.
«Интергаз Орталық Азия» акционерлік қоғамына қарасты учаскеде жұмыс істеген компания жұмысшысы газ құбырына арнап қазылған ор ішінде қарлығаштардың ұя салып тастағанын көреді. Содан ол осы шұңқырды көмуден бас тартады. Қасындағы әріптестерін де құстарды аман алып қалуға үгіттейді. Газ құбыры – «ҚазТрансгазАймақ» АҚ-ға тиесілі. 30 маусым күні Батыс Қазақстан облысы Жаңақала ауданының аумағында болған оқиға туралы баяндаған Асқардың бейнежазбасы әлеуметтік желілерде кеңінен таралып кетті.
– Әп-әдемі айыр құйрық қарлығаштар траншея ішінен ұя салып тастаған. Қарлығаштар балапан басып жатыр. Мына құбырды қалай көмемін?! Обал-ай. Қазір мен үйілген топырақты итерсем, бәрі шырылдап маған қарай ұшады. Жапатармағай көліктің әйнегіне келіп соғылайын деп тұр. «Ей, адам, не болды саған? Сондай қатігез болып кеттің бе?» дер еді, тіл бітсе… Кеше де қарлығаштар ұя салған траншеяларды көмбей кетіп қалдым. Тап қазір жұмыстан шығып кетсем де, мынадай қиянат жасай алмаспын, – дейді алаңсыз ұшып-қонып жүрген қарлығаштарға ұялы телефон камерасын бағыттаған Асқар Иманғали.
View this post on Instagram
Дегенмен Асқардың шырылдағанына бригада құлақ аса қойған жоқ. Қасындағы жігіттер оның өтінішін құп алғанымен, басқа техникалардың күшімен тап сол жерді көміп тастады. Ертесіне Асқар өзінің тұрғылықты жері – Атырау облысындағы Индер ауылына оралады. Құстардың өліміне жаны қатты күйзелген. Кейіпкеріміз өзі туралы әлеуметтік желілер мен сайттарда жаңсақ ақпарат тарап жатқанын айтты. Ол ауысым бойынша жұмыс учаскесіндегі мердігер ЖШС-ның арнайы техникасын жүргізеді екен. Шағын еңбек ұжымының беделіне нұқсан келмесін деп, компанияның атын атаудан бас тартты.
– Жұмыс барысы кешіктірілместен атқарылуы тиіс екенін білемін. Учаскедегі қарбалас тірлік бір екі-күнде бітпейді. Құбыр ауыстыру, дәнекерлеу, қысыммен тексеру, тестілеу, оқшаулау – оның барлығы уақыт алады. Бірақ қазылған жерді топырақпен тегістеп болғанша, құстар ұя салып тастайды, — деп түсіндірді табиғат жанашыры.
Ол бұған дейін тап осындай оқиға бірнеше рет қайталанғанына налиды. Иманғалиев «оның жұмыстан кеткені» туралы желілерде таралған ақпарат қате екенін, соның салдарынан жұмыс берушілерге қысым артқанын, медиақұралдарға мәселені нақты өзінен сұрау керектігін ескертті.
– Мен бас тартқаныммен, басқа жалдамалы мекеме погрузчиктері қарлығаштар ұя салған тұсты көміп тастады, солардың бәрін тоқтата алмағаныма қатты өкінемін. Тек бір-екі жігіт қана тапсырманы орындаудан бас тартып, олар да менің өтінішіммен көмбей кетіп қалды. Табиғат заңдылығына қарсы әрекет жасайтынымыз жаныма батады. Неге біз соншама қатігезбіз? «Топан су, зілзала, өрт, апат қайдан келіп жатыр?» деп таң қаламыз, ал өзіміздің істеп отырған тірлігіміз мынау! – дейді Асқар Иманғали.
Асқар Иманғали бүгінде Атырау облысы Индер ауданының орталығында тұрады. Жасы – 48-де. Отбасылы. Алты бала өсіріп отыр. Екі қолға бір күрек іздеп, бірнеше рет басқа мемлекеттерде еңбек еткен. Оның инстаграмынан Еуропаның көптеген қаласын аралағанын көруге болады. Индер ауылының тұрғыны тумысынан табиғатқа деген сүйіспеншілігі ерекше екенін айтты.
«Әке көрген оқ жонар» демекші, перзенттеріне де жан-жануар, аң-құсты аялау керек екенін ұдайы айтып отырады. Белсенді азамат балаларын ертіп, ерікті түрде экологиялық акцияларға қатысады. Өзен жағасындағы, демалыс орындарындағы, орман-тоғайдың ішіндегі қоқыс-қалдықтарды жинайды.
Қазіргі уақытта Асқардың түсірген бейнежазбасына көпшілік алуан пікір жазып жатыр. Кейбір компания жұмыс орнын ұсынаса, кейбір кәсіпкерлер қаржылай демеу көрсетуге ниет танытқан. «Депутат, заңгер, бизнесмендер жұмыс береміз, көмектесеміз деп жатыр. «Біреулер жұмыссыз қалған болсаң, қаржылай көмек береміз» деп Kaspi GOLD нөмірін сұрап жатыр. Бәріне мың алғыс, ештеңе керек емес. Ниеттеріне рақмет. Ризық-несібе – Құдайдан. Ер жігіттің басына не келіп, не кетпейді…», – дейді Асқар Борисұлы.
Кейіпкерімізбен тілдесе отырып, оның өте қарапайым болмысын жақыннан тани түстік. Асқардың атасы Батыс Қазақстан облысындағы әртүрлі ауданда, әсіресе ұзақ жылдар бойы Тайпақ өңірінде еңбек еткен. Әкесі де өңірде ауыл шаруашылығы саласында қызмет атқарған, одан кейін Атырау облысында бір ауылды басқарған. Индерлік азамат оларды дәріптегендей болмайын деп, кеңірек жазуға рұқсат бермеді.
Жалпы Асқардың өзіндік ұстанымы бар азамат екенін аңғарғанымыз, әлеуметтік желіде өткір пікірін жиі жариялайды екен. Бұған дейін далада электр сымы жүргізілген бағаналар басына қонған қарақұстар мен қыран тектес құстардың тоққа соғылып өліп жатқаны туралы да жазба қалдырған. Экосақшы осындай бастамаларға билік пен қоғам назар аударса екен дейді. Ол жан-жануар әлеміне көзқарасты өзгертетін кез келді деп есептейді.
