Батыс Қазақстан облысындағы Казталов ауданының орталығы Казталов ауылы мен Әжібай ауылы арасына салынған жол бір жылға жетпей шұрық-тесік болды. Аты-жөнін көрсетпеуді сұраған сол ауылдың тұрғыны бізге жолдың тесіліп жатқан фотосын жіберіп, жолдың сапасыз салынғанына наразылық білдірді.
Өткен жылы басталған жол құрылысын «Жайық Сити» ЖШС салған. Бұл жолға облыстық бюджеттен 208 млн теңге қаржы бөлінген. Жолдың техникалық қадағалаушы — «Музтау» ЖШС болса, авторлық қадағалаушы — «STROYCONSALTING» ЖШС.
Казталов ауданы жолаушылар көлігі және автомобиль жолдары бөлімінің басшысы Артур Берденов жолдың шұрық-тесігі шығып жатқанын жоққа шығарды.
– Асфальтта құрттай тесіктер бар, бірақ шұрық-тесік боп жатқан ештеңесі жоқ. Біз әлі бұл жолды қабылдаған жоқпыз. Мен мердігер мекеме басшысына жолдың тесік жерлерін қалына келтірмей қабылдамайтынымды айттым. Қолымызда үш жылға дейін жарамды кепілдік хат бар,- дейді ол.
Шенеунік асфальттың тесіліп қалу себебін ауыр жүк көліктері өтуімен байланыстырып отыр.
-Жәнібек ауданы жағына жол салынып жатырғасын бұл жолмен «КамАз» секілді ауыр жүк көліктері көп өтеді. Асфальттың тесілуіне негізгі фактор осы деп ойлаймын. Одан кейін жол құрылысы өткен жылдың қараша айында басталды. Енді күз мезгілінде салынғасын асфальттың тесіліп қалуына ауа райының да әсері бар шығар,- дейді Артур Берденов.
Оның айтуынша, жоба екі жылға жасақталған. Өткен жылы қаржы аз бөлінуінен тек 1 шақырым, 300 метр жол салынған. Қалған 1 шақырым, 900 метрі күні кеше аяқталған көрінеді.
Ал Әжібай ауылының әкімі Жігер Жакиев жолдың тесіліп ойдым-ойдым болуына ауыр жүк көліктерінің еш қатысы жоқ екенін айтады.
– Бұл жолдан ауыр техникалар жиі өтіп жатқан жоқ. Жол сапасыз салынғаннан кейін осындай боп жатыр,-деді қысқа ғана пікір білдірген әкім.
Бұл мәселеге қатысты жол құрылысын жүргізген «Жайық Сити» ЖШС басшысы Мереке Молдағалиевке хабарласқан едік, алайда ол қоңырауға жауап бермеді.
Есенжол Елекенов,
sarapshy.info
