2025 жылдың бірінші жартыжылдығында БҚО-да сауда және тұтынушылардың құқықтарын қорғау департаменті кәсіпкерлер қызметіне шағымданған азаматтарға 27 миллион теңгесін қайтарған. Бұл жөнінде департамент басшысы Э. Қиматова хабарлады.
Департаментке 6 ай ішінде 452 жазбаша өтініш келіп түскен. Оның ішінде 319 шағым (91,6%) оң шешімін тапқан.
Азаматтарды жеке қабылдау барысында айтылған 147, сенім телефоны арқылы тіркелген 115 өтініш те қанағаттандырылды.
Тексеріс нәтижесінде 11 әкімшілік іс қозғалып, кәсіпкерлерге айыппұл салынған.
Оралда жиһаз дайындау және орнатумен айналысатын «Модерн Плюс» компаниясына 18 азамат шағымданған. Келісімшарт жасалғанымен, тұтынушылар жиһаздарын уақтылы ала алмаған. Департамент шағымданушылардың мүддесін қорғап, бұл істі сотқа жолдады.
29 мамырда тұрғын автосалоннан несиеге 9,6 млн теңге тұратын көлік сатып алады. Келесі күні көліктен техникалық ақау шығып, тұтынушы автосалонмен келісімшартты бұзғысы келеді. Департамент көмегімен оның несие шарты жойылып, бастапқы жарна ретінде салған 1,8 млн теңгесі қайтарылды.
Сонымен қатар өңірде сауда қызметін реттеу бағыты бойынша 144 құқық бұзушылық анықталды. Әлеуметтік маңызы бар азық-түлік тауарларына заңмен белгіленген 15%-дан жоғары үстеме қосу және заңсыз сыйақы талап ету секілді заңбұзушылықтар анықталып, кәсіпкерлерге тиісті шара қолданылды.
фото: pexels
