Атырау облысында іс-түссіз жоғалған Қарабалин әулетінің қызы мен ұлы Мирамгүл мен Наурыздың мәйіті табылды. Бұл туралы жергілікті «Ақ Жайық» басылымы хабарлады.
Басылым мәліметінше, Сұлтан Сәрсемалиев Наурыз бен Мирамгүлді өлтіргенін мойындаған. Оның айтуынша, ол мәйіттерді бұрын өзі жалдап тұрған Геолог ықшамауданындағы үйдің ауласына көмген.
Аталған үй ауласынан екі адамның денесі табылды.
Айта кетейік, биыл қаңтар айында Атырау облысының Жангелдин ауылында бір отбасынан шыққан алты адамның із-түссіз жоғалғаны белгілі болды.
6 қаңтарда Мақсот Қарабалин мен оның жұбайы Нәсіп Өтешқалиеваның денесі табылды.
27 ақпанда Сұлтан Сәрсемалиев әйелі Ақбаян Мұқанғалиевамен Индонезияның Ломбок аралында ұсталды. Солтүстік Ломбок полиция басқармасы оларды қамауға алған.
Ер адам әйелі Ақбаянның төрт туысын өлтірді деген күдікке ілінді. Бұған дейін оның өз үйіндегі сарайдың еденінің астынан Ақбаянның ата-анасының мәйіттері табылды.
Күдіктілер бұған дейін Индонезияның Ломбок аралында ұсталған еді.
фото: Ақ Жайық
