Атырау облысында бір отбасынан шыққан алты адамның із-түссіз жоғалуына байланысты қылмыстық іс қозғалды. Бұл туралы Атырау облысының полиция департаменті хабарлады.
Құқық қорғау органдары Қызылқоға ауданының Жангелдин ауылында тұратын ерлі-зайыптыны және олардың 35, 33 және 31 жастағы екі қызы мен бір ұлын және 30 жастағы күйеу баласын бір айдан астам уақыт бойы іздестіріп жатыр.
2025 жылдың қараша айының басында отбасы «Дәрігерге барып қайтамыз» деп жолға шығып, содан бері үйлеріне оралмаған. Айта кетейік, олардың үй-жайы жинақы күйінде тұр. Малы мен азық-түлігіне ешкім тиіспеген. Отбасы қарашадан желтоқсанға дейінгі зейнетақыларын алдын ала шешіп алған, ал ауладағы малды алдын ала сатқан.
Отбасының кіші қызы Ақбаян да күйеуі Сұлтанмен бірге 5 қараша күні жолға шығып, содан бері хабарсыз кеткен. Олардың бес баласын қазір енесі қарап отыр.
Атырау облысының ПД бастығының бірінші орынбасары, полковник Құттыбай Садықовтың айтуынша, қазір өңірдегі мемлекеттік және жекеменшік медициналық мекемелер тексеріліп жатыр. Сондай-ақ жоғалған азаматтардың телефон нөмірлері Қазақстан аумағында бірнеше рет қосылып-өшірілген, соңғы рет Шымкент қаласында, одан кейін Өзбекстан аймағында ұялы байланыс тіркелгені анықталды.
Полиция іздестіру жұмыстарын ресми түрде 2025 жылдың 29 желтоқсанында бастады. Іздестіру үшін арнайы жедел-тергеу тобы құрылып, Ішкі істер министрлігінің сарапшылары тартылды.
Құттыбай Садықовтың айтуынша, екі немесе одан да көп адамның із-түзсіз жоғалуы Қылмыстық кодекстің 99-бабы («Адам өлтіру») бойынша қаралады.
