Атырау облысында отбасы мүшелерін өлтірді деген күдікке ілінген ерлі-зайыпты наурыз айының соңына дейін Индонезиядан Қазақстанға қайтарылады. Бұл туралы Ішкі істер министрінің орынбасары Санжар Әділов мәлімдеді.
Отбасының екі ересек баласы Мирамгүл Қарабалина мен Наурыз Мұқанғалиевты іздестіру жұмыстары әлі жалғасып жатыр.
Естеріңізге сала кетейік, 2026 жылдың қаңтарында Атырау облысындағы Жангелдин ауылында бір отбасынан шыққан алты адамның із-түссіз жоғалуына байланысты қылмыстық іс қозғалды.
6 қаңтарда Қарабалиндардың үйінің аумағынан отбасының екі мүшесі – отағасы Мақсот Қарабалин мен оның жұбайы Нәсіп Өтешқалиеваның денесі табылды.
27 ақпанда Сұлтан Сәрсемалиев әйелі Ақбаян Мұқанғалиевамен Индонезияның Ломбок аралында ұсталды. Солтүстік Ломбок полиция басқармасы оларды қамауға алған.
Сәрсемалиев пен Мұқанғалиеваның 5 баласы бар. Қазір балалардың үшеуі Кәмелетке толмағандарды бейімдеу орталығына орналастырылған.
фото: International National Police
