Air Astana ұшақ қонғаннан кейін қайтыс болған бес жасар қыздың әкесіне 5 миллион теңге моралбдық өтемақы төлейді. Алматы қаласының Түрксіб аудандық сотының шешімі туралы адвокат Данильхан Шагатаев хабарлады.
Адвокат баланың ауыр дерттен көз жұмғанын, оған әуе компаниясын кінәлауға болмайтынын ескертті. Бірақ Air Astana мүгедектігі бар балаға тиісті деңгейде көмек беруді ұйымдастырмаған, Алматыдағы халықаралық әуежайға алдын ала хабар бермеген. Бұл оқиға қаңтар айында болған.
Соттың баспасөз қызметінің мәліметі бойынша әуетасымалдаушы медицина талаптарына сәйкес келмейтін мүгедектер арбасын ұсынған. Бүлдіршінді терминалға жеткізу ережеге қайшы болған. Әуежайға алып баруы тиіс реаномобиль ұшақ қасынан табылмады. Оның орнына мүмкіндігі шектеулі жолаушыларды отырғызуға және түсіруге ғана арналған арнайы техника-амбулифтпен тасымалдаған.
«Бұған дейінгі келісім бойынша келіп жеткен, ішінде реаниматолог-дәрігер мен талапқоюшының жұбайы болған жеке реанимобиль көлігі әуежай аумағына кіргізілмеген. Сонымен қатар, әуежай аумағынан шығудың еш қажеті болмағанына қарамастан, талап қоюшыға жедел жәрдем көлігін ұсынудан бас тартылған», — делінген сот материалында.
Тергеу барысында басқа да бұзушылықтар анықталды. Бала қозғала алмайтын болған соң әуежай қызметкерлері құжатты тексеруді медпунктте жүргізуі керек еді.
«Шекаралық бақылаудан өту кезінде кератитпен ауыратын баланың көзіне жапсырылған қорғаныш таңғыштар оны суретке түсіру үшін күштеп алынған. Соның салдарынан келесі күні бала екіжақты пневмоторакспен ауруханаға жатқызылып, ақпан айында көз жұмған», — деп хабарлады соттың баспасөз қызметі.
Осыған байланысты сот әуе компаниясына моральдық өтемақы қыздың әкесі Зульяр Илахуновқа төлеуді міндеттеді. Шагатаев баланың ата-анасы мүмкіндігі шектеулі адамдарға қызмет көрсету стандарттарын жетілдіру үшін заңнамалық өзерістерге енгізу жөнінде өкілетті органдарға ұсыныс жасамақ.
«Біздің мақсатымыз – осы іске, мүмкіндігі шектеулі жандардың құқықтарының бұзылуына назар аудару. Көптеген халықаралық және қазақстандық стандарттар тек ұсыныс сипатында болады», — деп жазды қорғаушы.
Былтыр Air Astana компаниясына қарасты FlyArystan оралдық бүлдіршін Зерені ұшақтан қалдырып кеткен. Одан кейін қыздың анасы Жанар Мусина сотқа шағымданып, Air Astana-дан 5 млн теңге өндірді. Жолаушы құқығын Шагатаев қорғаған еді.
фото: gov.kz
