Шығыс Қазақстан соты Өскемен қаласының әкімін бірыңғай уақыт белдеуіне қарсы митингіге рұқсат бермегені үшін кінәлі деп тапты. Шешім 4 наурызда шығарылған. Бұл туралы талап-арыз иесі, белсенді Леонид Карташев 6 наурызда Азаттыққа мәлімдеді.
Белсендінің Азаттыққа айтуынша, әділ шешімге қол жеткізу оңай болмаған.
«Сот процесі үш айға созылды. Қала әкімдігі менімен келісімге келіп, арызымды қайтарып алуымды бірнеше рет сұрады. Егер арызымды қайтарып алсам, митинг өткізуіме рұқсат бермек болды. Алайда мен өз позициямнан бас тартпадым,» – деді Карташев.
Белсенді бірыңғай уақыт белдеуіне қарсы митинг ұйымдастыру үшін бірнеше рет әкімдікке өтініш берген. 2023 жылдың желтоқсан айында митинг өткізуге рұқсат ала алмаған кезде, әкімдік «алаңдар бос емес» деген уәж айтқан. Алайда Карташев дәл сол уақытта алаңда ешқандай іс-шара өтпегенін анықтаған. Сотқа оның 2023 жылғы 2 желтоқсанда берген өтініші негізінде жүгінгені белгілі болды.
Сот шешімінде қала әкімінің белсендінің митинг өткізуіне рұқсат бермеуі заңсыз деп танылып, әкімдікке бір ай ішінде митинг өткізуге мүмкіндік беру міндеттелді.
Белсенді Карташев уақыт белдеуіне қатысты акцияны 14 наурызда өткізуді жоспарлап отыр.
2024 жылдың 1 наурызынан бастап, Қазақстан бірыңғай уақыт белдеуіне ауысты. Алайда бұл шешім қоғамда әлі күнге дейін даулы мәселеге айналып келеді. Уақыт белдеуінің ауысқаны қолайсыздық тудырып жатқанын айтып, үндеу жариялаған тұрғындарға Бектенов бірыңғай уақыт белдеуіне халық көндігеді деген еді.
DEMOSCOPE бюросы жүргізген сауалнама нәтижесі Қазақстан азаматтарының жартысынан көбі бірыңғай уақыт белдеуіне қарсы екенін көрсетті. Әсіресе, Шығыс Қазақстан, Солтүстік, Ақмола, Алматы облыстарында күннің ерте батқанына және таңның ерте атқанына шағымданғандар көбейді. Осыған дейін белсенділер бірнеше мәрте петиция жариялады.
Алайда әлі күнге дейін бірыңғай уақыт белдеуі өзгеріссіз қалды.
Сурет: Turkystan.kz
