Үкімет басшысы Олжас Бектенов Қостанай тұрғындарымен кездескен кезде бірыңғай уақыт белдеуінің пайдасы жөнінде айтқан. Үкіметтің баспасөз қызметі жаңа уақыт кестесін жиынға қатысқан тұрғындар қолдап сөйледі деп жазды.
Бектенов ғылыми зерттеу қорытындысы бойынша сағаттың ауысуы қоғамға оң өзгеріс алып келеді деп түсіндірген.
«Шешім Қазақстанда ғана емес, шетелде де жүргізілген өте терең ғылыми зерттеулер негізінде қабылданды», — деді Бектенов.
Үкімет басшысы UТC+5 белдеуіне көшу дұрыс шешім болды деп есептейді. Уақыт ырғағына тұрғындар біртіндеп көндігеді деп тұжырымдады. Тіпті аса қолайсыз болса, жұмыс кестесін қарастыруға дайын екендерін де мәлімдеді.
«Мен бірыңғай уақыт белдеуіне ауысу кейбір адамдарға ыңғайсыздық тудыруы мүмкін екенін түсінемін. Ағза біртіндеп үйренеді. Осындай шешім қабылданды. Егер өңірлерде қандай да бір қолайсыздық туындаса, біздің еңбек заңнамамыз мүмкіндік беретін инфрақұрылымды, жарықтандыруды, ыңғайлы кестені ұйымдастыру арқылы жұмыс істеу қажет. Осы мәселелердің барлығын әрі қарай шешетін боламыз», — деді премьер-министр.
Бірақ Бектенов «табиғи уақытқа сәйкес» өмір сүру қаншалықты пайдалы екенін айтқанымен, Қазақстанға қатысты нақты қандай зерттеу жұмысы жүргізілгенін ашып айтпады.
Осы тұста бірнеше сұрақ туындайтыны заңды. Егер ғылыми зерттеу жұмысы жүргізіліп қойған болса, үкіметтің тағы неге шығынданайын деп отырғаны белгісіз. Қараша айында Ғылым және білім министрі Саясат Нұрбек жаңа уақыт белдеуінің әсерін зерттеуге 100 млн теңге сұраған. Денсаулық сақтау министрлігі 160 млн теңге керек деген ұсыныс жасаған.
Бірыңғай уақыт белдеуіне қатысты бірнеше петиция жарияланды. Бірақ тұрғындар талабы орындалған жоқ. Шығыс Қазақстан, Алматы, Жетісу облыстарының тұрғындары түс ауа күн ұясына батып кететінін, таң жай ататынын айтып жиі шағымданады.
Астана қаласының азаматтық істері жөніндегі ауданаралық сотында ШҚО атынан Қазақстан Республикасының Үкіметіне талап қойған заңгер Серікжан Ахметжанов ұтылып қалды. Ахметжанов «Қазақстан Республикасының аумағында уақытты есептеу тәртібі туралы» 2000 жылғы 23 қарашадағы №1749 және оған өзгерістер енгізу туралы 2024 жылғы 19 қаңтардағы №20 қаулыны заңсыз деп тану керек екенін айтқан.
Сот Үкіметтің қаулыны мүлде жаңа құжат етіп жазып шығуына өкілеттігі жоқ деп шешті. Қаулы 2000 жылы қабылданғандықтан, оны даулайтын уақыт өтіп кетті деген уәж ұсынды. Талап қоюшы тарап құжат қабылданғаннан кейін үш жыл ішінде сотқа шағымдануға тиіс деп тұжырымдады сот органы.
Нұртай Текебай
Сурет: Pixabay
