Алдағы уақытта Alatau City біртұтас экожүйе ретінде арнайы мәртебеге ие болады. Бұл жөнінде президент Қасым-Жомарт Тоқаев айтты.
Сарапшылардың дерегінше, 2033 жылға қарай жасанды интеллект нарығының көлемі 5 триллион долларға жетіп, оның әлемдік технология индустриясындағы үлесі 30%-ға дейін артуы мүмкін.
– Біз Қытайдың Жасанды интеллект саласындағы ынтымақтастық жөніндегі жаһандық ұйым құру бастамасын қолдаймыз. Қазақстанда цифрлық экономиканы дамыту бойынша жүйелі шаралар қолға алынуда. Жасанды интеллект технологиясын кеңінен қолданысқа енгізу үшін ауқымды жұмыс істеліп жатыр. Биыл Қазақстанда аймақтағы алғашқы суперкомпьютер іске қосылды. Сондай-ақ AlemAI халықаралық жасанды интеллект орталығы ашылды, — деді Тоқаев.
Ол Alatau City жаңа қала салу жобасына айрықша мән беріліп отырғанын айтты.
– Бұл қала елімізде және тұтас аймақта инновацияны, криптоиндустрия мен технологиялық кәсіпкерлікті дамытуға жол ашатын қуатты орталық болуға тиіс. Осы орайда, біз қытайлық компаниялармен өзара тығыз байланыста жұмыс істеуге ниеттіміз. Бүгін China State Construction Engineering Corporation компаниясы қазақ тарапымен тиісті келісімге қол қояды. Біз оны толық қолдаймыз. Құрылысты тез арада бастау қажет деп ойлаймын. Жақын арада Alatau City біртұтас экожүйе ретінде арнайы мәртебеге ие болады, — дейді президент.
Осыған дейін Алматы облысында салынатын Алатау қаласына Қытай даму институты көмектесетінін жазған едік. Институттың осыған дейін 10 елде АЭА құру бойынша тәжірибесі бар.
Қаланың кешенді жоспарын Сингапур елінің Surbana Jurong компаниясы әзірлеген. БАҚ-та Alatau City жобасына 40-қа жуық инвестор қызығып отырғаны айтылды.
Жобаны іске асырушылардың пікірінше, қала республикалық маңызы бар Алматы-Өскемен тасжолының бойында орналасады. Жалпы аумағы 88 мың гектар болатын аймақта қазіргі таңда 53 мың тұрғын, 12 елдімекен бар. Жоба бойынша Алатау қаласына Жетіген ауылы, Талғар ауданындағы Дәулет және Қайрат ауылдары, Іле ауданындағы Жетіген, Еңбек, Жаңаарна, Құйған, Жаңадәуір, Жаңаталап, Ынтымақ, Қоянқұс елдімекендері мен Қонаев әкімшілігіне қарасты Заречное және Арна ауылдары кіреді.
Үкімет Алатау қаласы құрылысын қаржыландырмайды.
Жалпы 2025-2027 жылдарға арналған республикалық бюджетте Алматы облысы әкімдігіне 2025 жылы жалпы 79,2 млрд теңге бөлу көзделген.
Фото: Алматы облысының әкімдігі
