«Өзенмұнайгаз» АҚ Бұрғылау жұмыстары басқармасының жұмысшылары толық жұмысқа шықты. Бұл туралы «ҚазМұнайГаз» ұлттық компаниясы телеграмда арнасында хабарлады.
2024 жылы 12 қарашадан бастап ереуілге шығып жатқан Бұрғылау жұмыстары басқармасының жұмысшылары бүгін, яғни 5 желтоқсанда толық жұмысқа шықты.
«Өзенмұнайгаз» қарасты БЖБ жұмысшылары кәсіподағымен келіссөз жүргізіліп, наразылық акциясы тоқтағанын, басқарма жұмысшыларының толық жұмысқа оралғанын хабарлады. Бітімгерлік комиссия отырысында заңға сәйкес құқықтық нормалар шеңберінде мұнайшылар көтерген мәселер қаралатыны айтылған.
“ҚР заңнамасына сәйкес еңбек қатынастары үшінші тұлғалардың араласуынсыз сындарлы диалог негізінде тікелей жұмыс беруші мен жұмысшылар арасында реттелуі тиіс екенін хабарлаймыз.ҚазМұнайГаз диалогқа әрдайым ашық және туындаған мәселелерді қолданыстағы заңның аясында шешу үшін өзара тиімді байланыс орнатуға дайын” — делінген хабарламада.
Естеріңізге сала кетейік, елдегі ірі кен орындарды игеруші компания «Өзенмұнайгаз» АҚ Бұрғылау жұмыстары басқармасының жұмысшылары басшылыққа бірнеше бағытта талап қойып, 12 қараша кешке ереуілге шыққан еді.
«ҚазМұнайГаз» ҰК АҚ осыған дейін жұмысшылардың әр талабы бойынша толық түсініктеме беріп, видео жолдау да жариялады. Атап айтқанда, зейнеткерлердің балаларының жұмысқа орналасуы қолданыстағы алгоритмге сәйкес тең дәрежеде жүзеге асатынын, ерте зейнетке шығу төлемдері жұмыс өтіліне қарай белгіленеді және қазіргі уақытта бұл ең жоғары деңгейде екенін айтты. Ұжымдық шарттың 2013 жылғы нұсқасын қайтару ҚР заңнамасына сәйкес келмейді, ал жаңа еңбекақы жүйесіне әділ бағалау қағидаттары енгізілді деді. Арнайы техниканы жаңарту жұмыстары жалғасуда, сондықтан жаңа жөндеу базасын салу тиімсіз деп танылды
Сурет: Маңғыстау облысы әкімдігі
