«Kazakh Tourism» ұлттық компаниясы «Үздік туристік ауыл – 2025» ұлттық байқауының қорытындысын жариялады.
Әр өңірден үш ауылды ұсынуға мүмкіндік берілді
«Байқау тұрақты туризмді дамытуға, бірегей табиғи ландшафттары бар, дәстүр мен қолөнерді сақтаған ауылдық аумақтарды анықтауға және ілгерілетуге бағытталған», — дейді жоба ұйымдастырушылары.
Байқауға қатысуға өтінімдер 2024 жылдың 30 желтоқсанына дейін қабылданды. Облыс әкімдіктеріне өңірден үш ауылды ұсынуға мүмкіндік берілген.
«Біз мәдениетке бай, дәстүр мен қолөнерді сақтаған, бірегей табиғи ландшафттары бар ауылдық аумақтарды анықтауға және ілгерілетуге ниеттіміз. Елді мекендер жаңа бағыттар мен аутентикалық туризмді таңдаған туристер үшін тартымды болуы мүмкін. Соңғы жылдары мұндай саяхатқа қызығушылық артып келеді», — деді «Kazakh Tourism» ұлттық компаниясының басшысы Қайрат Сәдуақасов.
Қатысушыларды іріктеу кезінде табиғи және мәдени ресурстарға, елді мекендердегі дәстүрлі қызмет түрлерінің сақталуына ерекше көңіл бөлінген.
Байқауға қатысушыларды туризм және оған сабақтас салалардағы сарапшылардан тұратын тәуелсіз кеңес мүшелері бағалаған.
Қазақстанның үздік бес туристік ауылы
- Лепсі ауылы (Жетісу облысы, Алакөл ауданы)
- Нағи Ілиясов (Қызылорда облысы, Сырдария ауданы)
- Хан ордасы (Батыс Қазақстан облысы, Бөкей ордасы ауданы)
- Поперечное (Шығыс Қазақстан облысы, Риддер ауданы)
- Шабанбай би (Қарағанды облысы, Ақтогай ауданы)
Ұлттық кезеңнің жеңімпаздары БҰҰ Дүниежүзілік туристік ұйымы (UNWTO) өткізетін UN Tourism Best Tourism Village халықаралық байқауында Қазақстанды таныстырады.
2023 жылы Алматы облысының Саты ауылы халықаралық деңгейде ең үздік туристік ауыл ретінде танылып, беделді «Best Tourism Villages by UNWTO» сыйлығымен марапатталды.
Елімізде қанша ауыл бар?
2024 жылғы шілдедегі есеп бойынша, елде 6 208 ауыл бар. Ұлттық статистика бюросының мәліметінше, бұл 2023 жылдың сәйкес кезеңімен салыстырғанда 78-ге аз.
Таратылған 78 елді мекеннің 50-і Түркістан және Қостанай облыстарына тиесілі. Қалған 28 ауыл Алматы, Шығыс Қазақстан, Абай және Қарағанды облыстарында таратылған.
Қазақстанда 17 облыс, 192 аудан, 90 қала, оның ішінде үш республикалық маңызы бар қала тіркелген. Сондай-ақ елімізде 29 кент, 2 165 ауылдық округ пен 6 208 ауыл бар.
Сурет авторы: Гүлмира Сарсенғали
