Қаржылық мониторинг агенттігі (ҚМА) Түркістан облысында жалған кепілдіктер рәсімдеу арқылы cубсидия ұрлаған қылмыстық топтың әрекетін тоқтатты. Олар 1,9 миллиард теңге бюджет қаражатын жымқырғысы келген.
Қылмыстық топ «Сыбаға» мемлекеттік бағдарламасы аясында ірі қара мал сатып алу үшін субсидиялауға бөлінген жеңілдетілген кредиттер алу үшін алаяқтық схемасын жасаған. Күдіктілер Кентау қаласында «Яссы-кредит НС» кредиттік серіктестігін құрған. Одан кейін іс жүзінде жоқ «Expert Consulting Group» ЖШС атынан жалған құжаттар мен мүлікті бағалау актілерін пайдаланған.
Қылмыстық схеманы ұйымдастырған адам мемлекеттік несие алу өтінімдерін қарау жөніндегі комиссияның төрағасы болған. Ол қатысушылардың іс-әрекетін үйлестіріп отырған. Жалған несиелер рәсімдеуге, бұрмаланған салыстыру актілерін жасауға қатысқан. Жымқырылған қаражат топ мүшелері арасында бөлінген.
Қылмыстық іс аясында 27 күдікті анықталған. Ал күдіктілердің жалпы құны 1 миллиард теңгеден астам мүлкіне тыйым салынған.
Осыған дейін БҚО-да шаруа қожалығы 20 миллион теңгеден астам субсидия қаражатын заңсыз иемденгенін жазған болатынбыз.
Одан бөлек субсидияға қатысты заңбұзушылықтар Алматы мен Түркістан облыстарында да анықталды.
Сондай-ақ 2025 жылдан бастап шаруаларға субсидияның орнына 5%-дан аспайтын несие беріледі.
Сурет: istockphoto.com
