North Caspian Operating Company (NCOC) инвесторы Қашаған мұнай кен орнында экологиялық талаптарды бұзғаны үшін айыппұл төлейтінін білсе де, әрекет етпеген. Бұл туралы Bloomberg агенттігі хабарлады.
Өндірістен артылған күкіртке қатысты шиеленіс 2016 жылы басталды. Ол кезде NCOC күкіртті кен орнының аумағындағы блоктарда сақтаған, алайда билік экологиялық тәуекелдерге байланысты компанияның бұл әрекетіне ескерту жасады.
2017 жылы Eni компаниясы (NCOC акционерлерінің бірі) NCOC-қа кен орнындағы күкірт көлемі жайлы шағым түсіреді. Ал 2019 жылы британдық Shell ықтимал айыппұл мөлшерін есептеп, бір тонна күкірт үшін 1,7-3,5 мың доллар деп бағалады.
2022 жылдың желтоқсанында Атырау облысының экология департаменті Қашаған кен орнының операторы North Caspian Operating Company-ды тексерді. Тексеріс нәтижесінде компанияның күкіртті сақтау ережелерін бұзғаны анықталып, 2,3 трлн теңге көлемінде айыппұл салынды.
NCOC бұл шешімді бірнеше рет аппеляцияға бергенімен, 2025 жылдың желтоқсанында сот Әкімшілік құқық бұзушылық туралы кодекстің 6-бабына сай («Жер қойнауын пайдалану операцияларын жүргізу қағидаларын бұзу») шешімін өзгертпеді.
NCOC сот алдында күкіртті сақтауға қажет рұқсат алғанын және сот процесінде процедуралық заңбұзушылықтар жіберілгенін алға тартады.
Айта кетейік, үкім әлі заңды күшіне енген жоқ.
фото: freepik.com
