Батыс Қазақстан облыстық сотының әкімшілік істер жөніндегі сот алқасы Орал қаласы әкімдігінің митинг өткізуге рұқсат бермеу туралы қаулысын заңсыз деп таныды. Бұл туралы облыстық соттың баспасөз қызметі хабарлады.
Орал қаласының әкіміне қарсы талап-арызды былтыр 10 тамызда азаматтық белсенді Марат Тұрымбетов пен Ренат Нұрымов берген. Олар бұл митингте утилизациялық алым мен автокөліктердің бастапқы тіркеуін алып тастауды талап еткісі келген. Алайда әкімдік белсенділер ұсынған орындарды да мақұлдамай, митинг өткізуге қарсы болған.
Облыстық сот әкімдіктің митинг өткізуге рұқсат бермей, ешқандай себеп түсіндірмегенін, басқа орын немесе уақыт ұсынбағанын және ұйымдастырушымен келісіп шешім қабылдамағанын анықтады. Осыған байланысты сот Орал әкімін бір ай ішінде бұл заң бұзушылықтарды түзетуге міндеттеді.
«Орал апталығы» басылымының мәліметінше, Марат Тұрымбетов тағы 12 рет митинг өткізуге рұқсат сұрап, әкімдікке өтініш берген. Ол әкімдіктің барлық өтініштен бас тартуын заңсыз деп сотқа жүгінуге мәжбүр болған. Оралдың әкімшілік соты оның талап-арызын қанағаттандырмаған. Дегенмен, 6 наурызда облыстық сот апелляциялық шағымды қарап, әкімдіктің әрекетін заңға қайшы деп таныған.
Белсенді Марат Тұрымбетовтың айтуынша, облыстық соттың шешімі азаматтардың құқықтарын қорғауда маңызды қадам болды. Енді әкімдік митинг өткізуге рұқсат беруден бас тартса, міндетті түрде себебін түсіндіріп, басқа орын мен уақыт ұсынуы керек. Олар сәуір айының соңында, су тасқыны аяқталған соң митинг өткізуді жоспарлап отыр.
Осыған дейін наурыз айының басында митинг өткізуге рұқсат бермегені үшін ШҚО әкімі кінәлі деп танылған болатын.
Сурет: Journalist.kz
