Құлсары қаласындағы Атырау шағынауданында салынып жатқан мектеп шатырының бір бөлігі опырылып қалды. Қазір апат себебі мен зақым көлемі анықталып жатыр.
Жергілікті «Ақ Жайық» порталы нысан ұлттық «Жайлы мектеп» жобасы аясында бой көтеріп жатқанын және 1 200 орынға есептелгенін жазды.
– Құрылыс аяқталғанға дейін бағдарламаның жауапты әкімшісі – Атырау облысының құрылыс басқармасы, — деп мәлімдеген білім басқармасы.
«Samruk-Kazyna Construction» АҚ Кұлсарыдағы осы жағдайға қатысты ресми жауап берді.
– Бұл нысанды «Turan Ascent» ЖШС ұлттық «Келешек мектептері» жобасы аясында салып жатыр. Мектепті 2025 жылдың соңына дейін пайдалануға беру жоспарланған. Алдын ала деректер бойынша, шатырдың опырылуына құрылыс материалдарын сақтау және жинақтау талаптарының бұзылуы себеп болған. Атап айтқанда, спорт залдың төбесінің шектеулі бөлігіне алты тоннадан асатын ауыр жабын материалдары қойылған, соның салдарынан құрылымдық элементтерде жергілікті зақымдану орын алған. Жағдайды егжей-тегжейлі зерттеу үшін тапсырыс беруші тарапынан басшылықтың, техникалық және авторлық қадағалаудың қатысуымен комиссия құрылды. Сонымен қатар көтергіш конструкциялардың беріктігін және жобалық шешімдерге сәйкестігін тексеру үшін арнайы техникалық сараптама ұйымы тартылды, — делінген мәлімдемеде.
Белгілі болғаны, қорытынды шешім сараптама нәтижесі бойынша қабылданады. Барлық анықталған кемшіліктерді мердігер компания толықтай жоюға міндетті.
– «Samruk-Kazyna Construction» АҚ «Келешек мектептері» ұлттық жобасын жүзеге асыру барысында сапа мен қауіпсіздік талаптарын қатаң сақтауды басты қағида ретінде ұстанады, — делінді ресми хабарламада.
Еске салсақ, БҚО-да осы «Келешек мектептері» ұлттық жобасы аясында 4 200 орынға үш мектеп пайдалануға берілгенін жазған едік. БҚО білім басқармасының дерегінше, жыл соңына дейін тағы да 3 300 орынға есептелген Бөрлі ауданында – үш, Орал қаласында – бір, Бәйтерек ауданында – бір, барлығы бес «Келешек мектебі» пайдалануға беріледі.
Фото/скриншот: azh.kz
