Батыс Қазақстанда жалпы білім беретін 379 мектеп бар. Оның ішінде 365-і күндізгі, екеуі кешкі, ал 12-сі жеке мектеп. Облыстағы 252 мектеп қазақ тілінде, 12 мектеп орыс тілінде, 115 мектеп аралас тілде білім береді. Бұл жөнінде Батыс Қазақстан облысының білім басқармасы Sarapshy.info порталына хабарлады.
Облыста 2020 жылы аралас тілде оқытатын 96 мектеп болса, 2024 жылы оның саны 114-ке жеткен.
- 2020 жылы – 96
- 2021 жылы – 102
- 2022 жылы – 106
- 2023 жылы – 109
- 2024 жылы – 114
Қазір өңірдегі аралас мектептердің сексені аудандарда орналасқан. Биыл оқушы саны азайып жабылған мектеп болмаған. Ал былтыр төрт бастауыш мектеп жабылды.
Өңірде 10,5 мың бала 1 сыныпқа қабылданды. Оның 76%-ы қазақ тілінде білім алуға өтініш берді.
Соңғы үш жыл ішінде 7 526 орынға арналған 26 мектеп салынды. Оның ішінде Қарашығанақ Петролиум Оперейтинг б.в. компаниясының әлеуметтік инвестициялық жобасы аясында 1 344 орынға 16 мектеп, жергілікті бюджет есебінен 1 982 орынға жеті мектеп, «Келешек мектептері» ұлттық жобасы аясында 4 200 орынға үш мектеп пайдалануға берілген. Биылғы жаңа оқу жылы қарсаңында Казталов ауданының Қоныс ауылында 60 орындық шағын мектеп, Бәйтерек ауданының Байқоныс ауылында 600 орындық заманауи «Келешек мектебі» ашылды.
БҚО білім басқармасының дерегінше, жыл соңына дейін тағы да 3 300 орынға есептелген Бөрлі ауданында – үш, Орал қаласында – бір, Бәйтерек ауданында – бір, барлығы бес «Келешек мектебі» және Орал қаласындағы дарынды балаларға арналған №8 облыстық мектеп пайдалануға беріледі. Сондай-ақ 2023-2025 жылдары 18 мектепте күрделі жөндеу жүргізілді.
Өңірде оқушы орнына тапшылық әлі де бар. Қазір тоғыз мектепте білім беру үрдісі үш ауысымда жүргізіліп отыр. Бұл мектептер Бәйтерек, Бөрлі аудандары мен Орал қаласында орналасқан. Соның ішінде үш үш ауысымды мектептің мәселесі енді пайдалануға берілетін «Келешек мектептері» есебінен шешілмек.
БҚО-да 2024-2025 жылғы оқу жылында 326 педагог маманға сұраныс болған. Ал жаңа оқу жылында ұстаздарды қызметке қабылдау әлі де жүргізіліп жатыр.
Соңғы жылдары өңірдегі үш орыс тілінде оқытатын мектепте қазақ сыныптары ашылып, аралас мектепке айналып отыр. Дегенмен аралас мектептердің бүтіндей қазақ тілді мектепке айналғаны тіркелмеді.
Фото: Sarapshy.info
