АҚШ Қазақстан мұнайын тасымалдайтын Каспий құбыр консорциумы инфрақұрылымына жасалған шабуылдарға байланысты Украинаға наразылық білдірді. Бұл туралы Украина елшісі Ольга Стефанишина мәлімдеді.
Елшінің айтуынша, Новороссийскідегі нысандарға шабуыл Қазақстан арқылы жүзеге асатын америкалық инвестицияларға әсер еткен.
Демарш Ресейдің әскери және энергетикалық инфрақұрылымына шабуыл жасауға толық тыйым салмайды, деп атап өтті Стефанишина. Ескерту АҚШ-тың экономикалық мүддесіне зиян келтіретін объектілерге қатысты берілген.
2025 жылдың ақпан, қыркүйек және қараша айларында Каспий құбыр консорциумына шабуыл жасалды. Шабуыл кезінде айлақшаларға зақым келіп, мұнай және газ конденсатын өндіру көлемі 6%-ға азайды.
Өткен жылдың желтоқсан айында Қазақстан Сыртқы істер министрлігі КҚК-ға жасалған шабуылға байланысты наразылық танытып, аталған оқиғаның алдын алу үшін нақты шаралар қабылдауды талап етті. Жауап ретінде Украина тарапы КҚК-ға қатысты алаңдаушылығын ескеретінін, алайда бұл әрекет Қазақстанға қарсы бағытталмағанын айтты.
Айта кетейік, жыл басында депутат Айдос Сарым Бас прокуратура мен Мәдениет және ақпарат министрлігіне жүгініп, әлеуметтік желілерде КҚК-ға жасалған шабуылды ашық қолдаған пікірлерге қатысты шағым білдірді. Тексеріс нәтижесінде қазақстандықтардың жазбаларынан құқық бұзушылық байқалмады.
фото: istockphoto.com
