сурет: ritual-rus.ru
Sarapshy.info ақпарат агенттігіне ҚР Денсаулық сақтау министрлігінің Медициналық көмекті ұйымдастыру департаменті елімізде патологоанатомиялық дәрігерлердің орташа тапшылығы 36% екенін хабарлады. Кадр тапшылығы Астана қаласында, Абай, Ақмола, Атырау, Маңғыстау, Жамбыл, Батыс Қазақстан және Солтүстік Қазақстан облыстарында байқалады. Мысалы Ұлытау облысында штаттық кестеге сәйкес 1 дәрігер-патологоанатом жұмыс істейді.
Бүгінде Астана, Алматы қалаларының, Семей және облыстардың денсаулық сақтау басқармаларына қарасты 220 патологоанатом дәрігер жұмыс істейді. Бұл есепке республикалық ғылыми-клиникалық орталықтар мен медициналық білім беру ұйымдарының кадрларын есептеп отырған жоқпыз.
Денсаулық сақтау министрлігінің бізге берген мәліметінше, қазір патологиялық анатомия саласында «мәйітхана» ұғымы қолданылмайды екен. Патологиялық диагностикамен айналысатын денсаулық сақтау ұйымдары – патологиялық бюро немесе патологиялық бөлім. Мәйітхана (прозектура) және гистологиялық, гистохимиялық, цитологиялық зерттеу зертханалары ПАБ құрамында болады.
ПАБ деп отырғанымыз – патологиялық-анатомиялық бюро. Елімізде патологиялық-анатомиялық қызметтер көрсететін 11 ПАБ бар. Оның ішінде облыстық деңгейдегі 8 ПАБ – Атырау, Ақтөбе, ШҚО, Тараз, БҚО, Қостанай, Қызылорда, Түркістан облыстарында. Ал Астана, Алматы мен Семейде қалалық деңгейдегі ПАБ. Петропавл мен Ақтауда орталықтандырылған патологиялық-анатомиялық бөлімше жұмыс жасауда.
Қалалық денсаулық сақтау ұйымдарында – 50 ПАБ, аудандық ауруханалар базасында 26 ПАБ және республикалық ғылыми орталықтар базасында 11 ПАБ орналасқан. Жалпы патологиялық зерттеулермен айналысатын мұндай 100 мекеме 614 денсаулық сақтау ұйымына қызмет көрсетеді.
Бұл патологиялық-анатомиялық бюролардағы істердің 90% адамның тірі кезінде аурулардың диагностикасы. Бұл – клиникада операция немесе биопсия арқылы алынған материалдарды гистологиялық (гистохимиялық) зерттеу және жағындылар мен дене сұйықтықтарын цитологиялық зерттеу. ПАБ жұмыстарының тек 10%-ы өлімнің себебін анықтау үшін мәйіттерді ашу ісі екен. Ал сот-медициналық сараптама қызметі Әділет министрлігінің құзырында.
БҚО-да бір патологиялық-анатомиялық бюро бар, онда алты патологоанатом дәрігер жұмыс жасайды.
Батыс Қазақстан облысының денсаулық сақтау басқармасының бізге берген мәліметінше, облыста биыл жаңа патологиялық-анатомиялық бюроның құрылысы жоспарлануда. Себебі патологиялық-анатомиялық қызметке қойылатын заманауи талаптарға сәйкес, жаңа мұздатқыш камераларды, экспресс диагностикасы, жабдық пен техникасы бар заманауи гистологиялық зертханаларды орнатуға мүмкіндік беретіндей кеңейтілген жаңа заманауи ғимаратты салуды қажет етеді. Сондай-ақ қазір Оралдағы ПАБ-қа жаңа жабдықтар да керек.
Нұрлыбек Рахманов,
БҚО
Біздің Instagram, Facebook парақшамызға, Telegram арнамызға жазылып, сараптама ақпарат оқыңыз.