Жоғары аудиторлық палатаның тексерісі нәтижесінде «СК-Фармация» және фармацевтика саласындағы бірқатар ұйымды қылмыстық тергеп-тексеру басталды. Депутаттар Бақытжан Базарбек пен Мұрат Әбенов жолдаған ресми сауалға Бас прокуратура осылай деп жауап берген.
Естеріңізге сала кетейік, «СК-Фармация» компаниясы – тегін медициналық көмектің аясында ұсынылатын дәрілік заттар мен медициналық құрал-жабдықтың бірыңғай дистрибьюторы.
4 маусымда Мәжілістің пленарлық отырысында Жоғары аудиторлық палатаның төрағасы Әлихан Смайылов елдегі дәрілік қамтамасыз ету жүйесіне қатысты қатаң сын айтты.
«Ғылыми өндірістің нәтижесі көңіл көншітпейді. Соңғы 10 жылда небәрі екі отандық препарат әзірленген. Оның біреуі ұлттық дәрілік формулярға енбеген, дегенмен оны жасап шығаруға төрт миллиард теңгеден астам қаржы жұмсалды», — деді палата төрағасы.
Смайыловтың сынынан кейін Мәжіліс депутаты Бақытжан Базарбек «СК-Фармация» ЖШС-на жүргізілген тексеру барысында анықталған бірнеше дерек бойынша Бас прокуратураға тергеу бастауды ұсынды.
Қазіргі кезде тергеу үш негізгі бағыт бойынша жүріп жатыр.
Біріншіден, «Инфекцияға қарсы препараттар ғылыми орталығы» акционерлік қоғамы жалған клиникалық зерттеулер жүргізіп, 166,4 млн теңге көлемінде қаражатты негізсіз игерген. Сондай-ақ шын мәнінде алынбаған жабдықтар үшін 36,7 млн теңге жұмсаған.
Екіншіден, бірыңғай дистрибьютор – «СК-Фармация» ЖШС дәрі-дәрмек сатып алған кезде мемлекетке 35,8 млрд теңге залал келтірген.
Үшіншіден, «КазМедПром» ЖШС медициналық қолғаптарды тым жоғары бағаға сату арқылы бюджет қаражатының 5,3 млрд теңгесін тиімсіз жұмсаған.
Бұл фактілер Бас прокуратураның есебіне тіркеліп, шешім қабылдау үшін Қаржылық мониторинг агенттігіне жолданды. Бұдан бөлек, Алматы қаласының прокуратурасына жалған клиникалық зерттеулер мен игерілмеген қаражат бойынша қосымша тексеру жүргізу туралы тапсырма берілді.
Бұған дейін БҚО-дағы Ақжайық ауданының ауруханасында 700-ден астам диспансерлік есептегі науқасқа тегін дәрі-дәрмек уақтылы берілмегені анықталды.
фото: pexels
