17 наурызда «Қазгидромет» мекемесінің БҚО филалы ұсынған гидрологиялық мониторинг деректеріне сәйкес, Батыс Қазақстан облысындағы өзендерде су деңгейінің көтерілгені байқалады.
Шыңғырлау ауданының Ақшат, Ақтау, Кеңтүбек ауылдарында Шыңғырлау өзенінің арнасы қауіпті деңгейге жақындап қалғаны байқалады. Қаратөбе ауданы Егіндікөл ауылы тұсында Қалдығайты өзеніндегі су деңгейі 319 сантиметрге жеткен. Аталған учаскелерде енді 100 сантиметрге көтерілсе, өзендер арнасынан тасуы ықтимал.
Тәулік бойы бақылау нәтижесінде бірнеше өзенде судың едәуір көтерілгенін байқауға болады.
- Жайық өзені (Орал қаласы) – 306 см (+46 см)
- Жайық өзені (Янайкин ауылы) – 341 см (+46 см)
- Жайық өзені (Көшім ауылы) – 301 см (+42 см)
- Шаған өзені (Мичурин ауылы) – 386 см (+216 см)
- Деркөл өзені (Зеленов ауылы) – 294 см (+32 см)
- Елек өзені (Тайпақ ауылы) – 307 см (+37 см)
- Шежін өзені (1-Шежін ауылы) – 340 см (+80 см)
- Қараөзен (Бостандық ауылы) – 346 см (+106 см)
- Сарыөзен (Қызылжар ауылы) – 310 см (+90 см)
БҚО-дағы кейбір өзенде судың күрт көтерілгені байқалады. Әсіресе, Шаған өзенінде тәулігіне 216 см деңгейінде көтерілген. Қараөзенде су 106, Сарыөзенде 90 сантиметрге көтерілді. Шежін мен Жайық өзендері арнасында су толып келеді.
Қазіргі уақытта қар күрт еріп жатыр және өзендерде сең жүруде.
Осыған дейін қардың күрт еруі салдарынан БҚО-да трассалар жабылды.
15 наурызда Қаратөбе ауданының Қаракөл ауылдық округіне қарасты Ақтайсай елді мекені маңындағы өткелдің үстінен қар суы өтіп, ауыл мен аудан орталығы арасындағы көлік қозғалысы уақытша тоқтатылды.
Сырым ауданының Аралтөбе ауылы маңында уақытша көпірді су шайып, аудан орталығымен қатынас үзілді. Қардың күрт еруі салдарынан 16 наурыз күні таңертең Шідерті өзеніндегі су деңгейі көтеріліп, көпірдің айналасындағы топырақты шайып кеткен.
Сурет: БҚО ТЖД
