Қардың күрт еруіне байланысты облыстағы автожолдар бойына су көп мөлшерде жиналуда. 14 наурызға қараған түні Орал-Белес-Переметный тасжолы жабылған. Бұл туралы БҚО Полиция департаменті хабарлады.
Департамент қазіргі уақытта облыс бойынша барлық трасса ашық деп мәлімдеді.
Орал қаласының Сарыарқа шағын ауданы мен Ынтымақ ауылында қызыл су жүріп жатыр.
Осыған дейін Қазақстанның сегіз аймағында тасқын болуы мүмкін екені айтылды. Оның ішінде Батыс Қазақстан облысы да бар. Былтыр батыс өңірі су тасқынынан ең көп зардап шеккен өңірдің бірі болған еді.
Одан бөлек тасқын қаупі жоғары аймақтарға Шығыс Қазақстан, Қарағанды, Ақмола, Солтүстік Қазақстан, Қостанай, Ақтөбе, Абай және Ұлытау облыстары кіріп отыр. Орташа қауіпті аймақтарға Алматы, Жетісу, Жамбыл, Атырау облыстары енді.
Орал қаласы әкімдігінің мәліметінше, су еріп, көшелерге кірген жағдайлар бойынша 8 наурыздан бері барлығы 311 өтініш түскен, соңғы тәулікте 142 өтініш, 13 наурыздан 14 наурызға қараған түні (00:00 – 08:00) 14 өтініш түскен.
Сондай-ақ Орал аумағынан 475 923 текше метр қар шығарылып, бір тәулікте 52 014 текше метр су сорылған.
Әкімдіктің мәліметіне сәйкес, қаладан бөлек ең көп қар Зашаған кентінен шығарылған – 88 000 текше метр, Деркөл – 41 500 текше метр, Круглоозерное – 6 332 текше метр, Желаево – 70 текше метр.
Сурет: Орал қаласы әкімдігі
