Төрт күннен бері жұмысқа шығудан бас тартып, жалақыларын көтеруді талап еткен жұмысшылармен кездесуге ККС-Sicim компаниясының бас директоры Джузеппе Роделли Италиядан келді, деп хабарлайды sarapshy.info ақпарат агенттігі.
БҚО-ның Ақсай қаласы маңындағы компанияның өндірістік базасында бүгін түстегі жұмысшылар мен италиялық басшының алғашқы кездесуі өте қысқа болды. Джузеппе Роделли БҚО әкімімен ақылдасып, кешке қарай шешімін айтатынын жеткізді.
Кешкі сағат 5-терде сол алаңда жұмысшылар алдына компанияның бас директоры қайтадан шығып сөйледі. Сөзін аудармашы қазақшаға аударып тұрды.
-Төртінші және бесінші категориялар біріктіріліп, соған 20 пайыз үстеме қосылады. Үйге барып келуде транспорт мәселесі шешіледі. Талаптарыңызды орындауға мүмкіндігімізді есептеу жайлы ККС-Sicim қаржыгерлеріне тапсырма бердім. 20 пайыз инфляцияға сай индекстеуге келісеміз. Соның өзі біздің компанияға ауыр, сіздер сұраған 50 пайызға өсіре алмаймыз, – деді ККС-Sicim компаниясының бас директоры Джузеппе Роделли. Жалақыны тамыз айында 10 пайызға өсіре алатынын айтып өтті.
Сөйтіп жұмысшылардың жалақыны 50 пайызға өсіру жайлы талабы орындалмайтын болды.
Қызметкерлердің ереуіліне қатысты БҚО әкімі Нариман Төреғалиев: «Ереуілге шыққан жұмысшылардың талабы орынсыз деп есептеймін. Компанияда ұжымдық келісімшарт бар, сондай-ақ, қызметкерлердің әрбірімен жеке еңбек шарты бар. Құжатта көрсетілген жұмыс берушінің міндеттемелері ішінде жалақыны 50% көтеру туралы сөз жоқ. Келісімшарт бойынша тек 20%-ға көбейтуге мүмкіндік бар”, – деді Үкімет кулуарында.
Еске сала кетсек, 16 қаңтардан бері бас көтеріп, талабын айтып тұрған жеті жүздей жұмысшымен кездесуге облыс және аудан әкімдігі, прокуратура мен еңбек инспекциясы өкілдері кездесті. 18 қаңтар күні жұмысшылар ҚР президенті Қасым-Жомарт Тоқаевқа видеоүндеу де жолдаған болатын.
ККС-Sicim – қазақстандық «КазКомСервис» және италиялық Sicim-нің біріккен мекемесі. КРО консорциумында мердігер ретінде мұнай-газ құбыры магистралін салумен айналысады.
Нұрлыбек Рахманов