Батыс Қазақстан облысының Қаратөбе ауданында Қалдығайты өзенінде су деңгейі көтеріліп, Жымпиты-Қаратөбе тас жолының өткелін бұзды.
БҚО Қаратөбе ауданының әкімі Қадыржан Сүйеуғалиев дәл қазір елде мекенге қауіп жоқ екенін айтты. Оқиға орнында төтенше жағдайлар департаменті (ТЖД), полиция, жергілікті билік өкілдері мен ҚР ТЖМ 20982 әскери бөлімінің сарбаздары жұмыс істеп жатыр. Су тасқынының салдарын жою үшін арнайы техника жұмылдырылған.
Осыған дейін БҚО-дағы кейбір өзенде су күрт көтерілген еді. Салдарынан облыс аймақтарында трассалар жабылды.
Сондай-ақ 15 наурызда Қаратөбе ауданының Қаракөл ауылдық округіне қарасты Ақтайсай елді мекені маңындағы өткелдің үстінен қар суы өтіп, ауыл мен аудан орталығы арасындағы көлік қозғалысы уақытша тоқтатылды.
