Чапай-Жаңақала автожолында 19 шілде төрт ер адам «Ануш Құрылыс» ЖШС-ның екі қызметкеріне шабуыл жасады. Бұл туралы жергілікті басылым ақпарат таратты.
43 жастағы Гаруш Балаянның денесіне жеті рет пышақ сұғылған. Ол Жаңақала аудандық ауруханасында шұғыл отадан өтті, қазіргі уақытта жағдайы ауыр. Қасындағы әріптесі Арслан Бисалиев те жараланып, көп қан жоғалтқан.
Олар жол жөндеу жұмысын бақылап жүрген. Куәгерлер шабуыл жасағандар мас күйінде Гарушқа тіл тигізіп, әдейі қол жұмсағанын айтқан.
Зардап шеккендер төрт ер адамның үстінен арыз жазған. Олардың айтуынша, бұл әрекетте ұлтараздық сипат белгісі болған, алайда іс әзірге Қылмыстық кодекстің 106-бабы («Денсаулыққа қасақана ауыр зиян келтіру») бойынша қарастырылып жатыр. Жәбірленуші жақ тергеу органынан ҚК 174-бабына сай («Әлеуметтік, ұлттық, рулық, нәсілдік, таптық немесе діни араздықты қоздыру») іс жүргізуді талап етті.
«Ануш Құрылыс» ЖШС-ның директоры Оганнес Минасян Sarapshy.info тілшісі қойған сауалға оқиғадан кейін басқа қызметкерлердің қауіпсіздігіне баса назар аударғанын атап өтті.
«Күдіктілерге жөндеу жұмысы жүріп жатқан нысан аумағына кіруге рұқсат берілмеген. Компанияның атынан тағы да арыз жазбақпыз. Бұл ерегестің нақты себебі белгісіз. Біздің жұмысшылар мен ол адамдар бұрын-соңды таныс болмаған. Құқық қорғау органдарынан бұл іске мұқият назар аударуды сұраймыз. Қазіргі кезде қол астымдағы өзге жұмысшыларға түсіндірме жұмыстарын жүргізіп жатырмын», — деді ол.
БҚО полиция департаментінің баспасөз қызметі төрт күдіктіні қамауға алғанын мәлімдеді.
«Денсаулыққа қасақана зиян келтіру фактісі бойынша қылмыстық іс қозғалды. Барлық күдікті уақытша ұстау изоляторына қамалды.
Оқиғаның мән-жайын анықтау үшін тергеу басталды. Қылмыстық істі тергеу — департамент басшылығының ерекше бақылауына алынды», — делінген ПД жолдаған хабарламада.
Естеріңізге сала кетейік, кейінгі кезде «Ануш Құрылыс» қызу оқиға ортасынан жиі көрінеді.
2024 жылдың сәуірінде мердігер Оганнес Минасян Чапай-Жаңақала-Сайқын автокөлік жолын жөндеуге құны 2,8 млрд теңгелік шартқа қол қойған.
Былтыр «Ануш Құрылыс» тек 2 км асфальт салған. 2025 жылдың басында Минасянмен қосымша шарт жасалып, жөндеу мерзімі ұзартылды. Компания БҚО әкімдігінен жалпы сомасы 8,3 млрд теңгені құрайтын 11 тендер ұтып алған.
фото: freepik.com
