Бізге жеткен ақпараттар бойынша Батыс Қазақстан облысы территориясынан сегіз ұшқышсыз ұшу аппараты мен оның бөлшектері табылды. Осыған байланысты Sarapshy.info редакциясы ҚР Ұлттық қауіпсіздік комитетіне сауалдар жолдаған болатын.
Sarapshy.info редакциясына 2025 жылдың ақпан-наурыз айында дрон мен оның бөлшектерінің ауылдарға жақын жерден табылуы бойынша 8 жағдай белгілі:
- 27 наурызда Қазталов ауданы, Көктерек ауылдық округіне қарасты Саралжын ауылының территориясында.
- 27 наурызда Жәнібек ауданы, Борсы ауылы аумағында
- 27 наурызда Жәнібек ауданы, Тау ауылына қарасты аумақта.
- 26 наурыз күні Жәнібек ауданы, Қамысты ауылы аумағынан.
- 24 наурыз күні Жәнібек ауданы Ұзынкөл ауылы маңында
- 23 наурыз күні Жәнібек ауданының Ұзынкөл ауылдық округіне қарасты Абдолла қыстағы маңынан
- 18 наурызда Тасқала ауданында дрон құлаған еді.
- 18 ақпанда Бөкей Ордасы ауданы, Ұялы ауылы маңынан табылды.
Жоғарыда аталған фактілерге қатысты көптеген сұрақтар туындап, құзырлы органдарға жолдадық. Соның ең бастылары — Мұндай фактілердің БҚО өңірінде ғана жиілеп кетуіне не себеп? Жыл басынан бері осыған қатысты қандай зерттеулер жасалып жатыр? Отандық әскери сарапшылар тартылды ма? Қай елдердің мамандары зерттеп жатыр? Бұл жағдайлар бойынша қандай шешім қабылданады? Ресей тарапынан ресми жауап бар ма?
Біздің ресми сұрауларымыз біраз жауапты органдардан өтіп, соңында Қазақстан Республикасы Ішкі істер министрлігінің баспасөз қызметі жауап берді.
Олар: «Батыс Қазақстан облысы аумағында ұшқышсыз ұшу аппараттарының құлау фактілері бойынша тексеру іс-шаралары жүргізілуде. Анықталған нысандар елді мекендерден алшақ, қашықтағы аумақтардан табылды. Қазіргі уақытта барлық мән-жайлар анықталу үстінде» деп жауап берді №ЗТ-2025-01120782 хатта.
Біз келтірген фактілер министрлік тарапынан жоққа да шығарылған жоқ. Тексерулер қанша уақытқа созылатыны әзірге белгісіз. Редакция бұл сұрақтарды жіті назарда ұстайды.
