Биыл Қазақстанда азаматтық авиация саласында техникалық ақауларға, рейстердің кешігуіне және әуе кемелерінің мәжбүрлі қонуына байланысты бірнеше оқиға тіркелді.
12 қазанда Қостанайдан жолға шыққан Qazaq Air компаниясының ұшағының дөңгелегі өртенді. Көлік министрлігі аталған жағдайға байланысты арнайы комиссия құрап, тергеу жұмыстарын бастады.
Қазан айының соңында Астана әуежайында Ақтауға ұшатын рейстің жолаушылары телетрапта бір сағаттан астам уақыт тұрған. Рейс экипаж талаптарын орындаудан бас тартқан жолаушы себебінен тоқтаған.
16 желтоқсанда Fly Arystan әуе компаниясының ұшағында қозғалтқыш іске қосылмай, салонда жарық өшкен.
17 желтоқсанда Air Astana компаниясының Алматыдан Астанаға жол тартқан ұшағында түтін шықты. Желіде тараған видеоларда салон төбесінен су тамшылағаны көрінеді.
18 желтоқсанда Air Astana әуе компаниясының Алматы – Бангкок бағытындағы рейсі техникалық ақауға байланысты Дели қаласына мәжбүрлі түрде қонды. Ұшақ бортында 138 жолаушы болған.
Айта кетейік, қараша айында Qazaq Air әуе компаниясының Атырау-Орал-Атырау бағытындағы рейстер тоқтатылды.
23 желтоқсанда Түркияда Анкара қаласынан Триполиге бағыт алған бизнес-джет құлап, Ливия армиясы бас штабының басшысы Мухаммед Али Ахмед аль-Хаддад қаза тапты.
фото: freepik.com
