Бүгін Мәжіліс «Тұтынушылардың құқықтарын қорғау туралы» заңның жаңа жобасы мен оған ілеспе түзетулерді бірінші оқылымда мақұлдады.
Заң жобасы тұтынушылардың құқықтарын қорғаудың қолданыстағы әдістерін жетілдіру мақсатымен әзірленген.
Жобаны әзірлеу кезінде ТМД елдерінің, сондай-ақ Германия, Польша, Түркия және басқа да елдердің тәжірибесі зерттеліп, бірқатар новеллалар ұсынылған.
«Азаматтық-құқықтық тұтынушылық дауларды шешу тәртібі көп сатыдан екі сатыға дейін жеңілдетіледі. Екіншіден, тұтынушылардың құқықтарын қорғау туралы заңның базалық қағидаттары салалық реттеу мен осы саладағы тиісті мемлекеттік органдардың құзыретін сақтай отырып, қаржылық қызметтерден басқа барлық қызмет көрсету салаларына қолданылады. Нәтижесінде уәкілетті орган тұтынушы құқықтарын қорғау мәселелері бойынша мемлекеттік органдардың қызметін салааралық үйлестіру жөніндегі өз функциясын толық іске асыра алады», – деді Сауда және интеграция министрі Арман Шаққалиев Мәжілістің жалпы отырысында.
Негізгі заң жобасы арқылы тұтынушылардың құқықтарын қорғау жөніндегі омбудсмен институты енгізіледі. Ол тұтынушыларға консультациялық көмек көрсетуге, олардың құқықтары мен заңды мүддесін қорғау үшін сотқа талап қоюға, сондай-ақ өзге де функцияларды орындауға құқылы болады.
Оны қызметке тағайындау және қызметтен босату уәкілетті орган (Сауда және интеграция министрлігі) басшысының құзырында болады.
Омбудсмен төрт жыл мерзімге сайланады және өз қызметін ерікті түрде (ақысыз) жүзеге асырады.
Сонымен қатар тұтынушылардың құқықтары мен заңды мүдделерін бұзатын және шектейтін жағдайларды шарттарға енгізуге жол бермеу жоспарланып отыр. Олай болмаған жағдайда шарттар жарамсыз деп танылады, ал мәміленің жарамсыздығы сот арқылы белгіленеді.
Сурет: freepik.com
