2025 жылдың III тоқсанында Қазақстандағы орналастыру орындарына қытайлықтарды өткен жылдың сәйкес кезеңімен салыстырғанда 43%-ға көп қабылдаған. Бұл туралы Data Bub Ұлттық статистика бюросының деректеріне сүйене отырып мәлімдеді.
Қытайдан келетін меймандар санының тұрақты өсуі пандемиядан кейінгі туристер ағынымен және 2022 жылдың ортасында енгізілген визасыз саясатпен түсіндіріледі. 2020 жылы аталған көрсеткіш іс жүзінде нөлге тең болғанымен, 2022 жылы 3,2 есе, 2023 жылы 3,6 есе, ал 2024 жылдың дәл осы кезеңінде 58%-ға артқан. 2025 жылдың 9 айында Қазақстан қонақ үйлерінде орналастырылған Қытай азаматтарының саны 182,8 мың адамға жетті.
Қазақстанның қонақ үйлерінде ең көп тұрақтайтындардың көшін Ресей азаматтары бастады. Айта кетейік, Ресейдің бұл рейтингтегі үлесі бір жылда 11 пайыздық тармаққа төмендесе, Қытайдың үлесі 18%-ға дейін өсті.
Таяуда Алматы әуежайында суррогаттық жолмен туылған сәбилерді елден алып шықпақ болған келген екі қытайлық отбасы ұсталды.
Қытай инвестициялары
Соңғы жылдары Қытайдың Қазақстандағы ірілі-кішілі жобаларға салып жатқан инвестицияларының саны артты.
Қазір Қазақстан аумағында салынатын 3 атом электр станциясының екеуінің құрылысына Қытайдың CNCC компаниясы жауап беретіні белгілі. Бірінші станцияны Балқаш көлі маңындағы Үлкен ауылында ресейлік «Росатом» тұрғызбақ.
2024 жылы Қазақстанда Алатау атты жаңа қала салу туралы жоспарланды. Қаланың инфрақұрылымын қытайлық China State Construction Engineering Corporation компаниясы жүргізбек. Үкімет Алатау қаласы құрылысын қаржыландырмайды.
Қытайдың елдегі энергетика нарығындағы ықпалы да күшейді. Қазір қытайлық мұнай-газ компаниялары қызметтерінің бағасын 70%-ға төмендетіп, қазақстандық жобалардың дамуына кедергі келтіріп отыр. Бұған PetroCouncil бірлестігі наразылық танытып, премьер-министрге өтініш жолдады.
Биыл қыркүйекте Батыс Қазақстан облысында метанол өндіретін газ-химия кешенінің құрылысы басталды. Негізгі мердігер – Қытайдың Xinjiang Sanbao Industrial Group Co., Ltd. компаниясы.
БҚО-дағы екі майнинг фермасының біреуі де қытайлық LLY Agro Energy компаниясына тиесілі. Ферма 2020 жылы ашылған.
фото: istockphoto.com
