Қытайлық мұнай-газ компаниялары қызметтерінің бағасын 70%-ға төмендетіп, қазақстандық жобалардың дамуына кедергі келтіріп отыр. Бұл туралы PetroCouncil бірлестігі хабарлады.
Ұйым премьер-министр Олжас Бектеновке әділ бәсекелестікті қалпына келтіру жөнінде хат жолдады. Хатта егер кешенді реттеу шаралары қабылданбаса, елдің мұнай-газ саласындағы әділ бәсекелестікке қауіп төнетіні айтылған.
PetroCouncil бәсекелестікті қорғау үшін тендерлердегі бағаны орташа нарықтық деңгейден 20%-дан артық төмендетуге шектеу қоюды, өтінімдерді бағалау кезінде жергілікті қамтуды басымдыққа алу және баға айырмашылығы аз болған жағдайда қазақстандық қатысушыларға басымдық беруді ұсынды.
PetroCouncil – 150-ге жуық жергілікті мұнайсервис және инжинирингтік кәсіпорынды біріктіретін ассоциация. Ұйымның мәліметінше, демпинг салдарынан қазақстандық компаниялар мұнай-газ саласындағы жобалардан шеттетіліп жатыр. Бұл бюджетке түсетін салық көлемінің азаюына және жұмыс орындарының қысқаруына, алып келуі мүмкін, деп мәлімдеді ассоциация.
фото: freepik.com
