Елдегі кәсіпорындар 2024 жылдың алғашқы 9 айында 82 мыңнан астам жеңіл автокөлік шығарған. 2028 жылға қарай елімізде жасалатын машина көлемін 2 есе арттыру жоспарланып отыр. Бұл туралы Өнеркәсіп және құрылыс министрі Қанат Шарлапаев Үкімет отырысында баяндады.
«Шетелдік және отандық инвесторлар ел аумағында жаңа зауыттар салу жұмысын жүргізіп жатыр. Мәселен, CHANGAN, HAVAL, CHERY автокөліктерін шығаратын зауыт құрылысы аяқталуға жақын. Бұл зауыттар жыл сайын 90 мың көлік шығаратын болады. Сонымен қатар құны 200 млн доллар болатын KIA автомобиль зауытының құрылысы жүргізіліп, онда 150 млн доллардың Geely, Exeed, КAIYI жеңіл автомобильдерінің өндірісі пысықталып жатыр», — деді министр.
Ал ауылшаруашылығына қажет көліктерді дайындау мақсатында жобалар жүзеге асып жатыр. Жыл басынан бері 5 мыңнан астам трактор мен комбайн құрастырылған.
«Елдегі ауыл шаруашылығы тауарын өндірушілер отандық өндірістің, оның ішінде CLAAS, Horsch, Deutz Fahr әлемдік брендтерінің заманауи техникасымен қамтамасыз етілген. Биыл жаңа ірі инвесторлар – Amazone және Zoomlion елге тартылды. Ірі габаритті бөлшектер өндірісі іске қосылды: трактор кабиналары мен комбайн бункерлері. Өндірушілер мен сабақтас өндірістер арасында кооперация жолға қойылды», — деді Шарлапаев.
Министр елдегі машина жасайтын кәсіпорындарды қолдау және дамыту мақсатында бірнеше шаралар жоспарланып жатқанын да атап өтті.
Біріншіден, елдегі кәсіпорындарды сақтау және өндірілетін өнімдердің үлесін арттыру мақсатында ұзақ мерзімді және офтейк келісімшарттар жасалған. Нақтырақ айтқанда, 2024 жылдың тоғыз айында жер қойнауын пайдаланушылар тарапынан 6 млрд теңгеге 30 ұзақ мерзімді келісімшарт және 4,2 млрд теңгеге үш оффтейк-контракт жасалды. Сонымен қатар жаңа тауарлар мен қызметтер тізімін әзірлеу жұмысы жүргізіліп жатыр.
Екіншіден, 1 500-ден астам машина жасау тауарларына мемлекеттік сатып алудан басымдық берілді. Бұл кәсіпорындардың жүктемесі мен дамуына оң әсер етеді, дейді министр.
Үшіншіден, машина жасау саласын дамыту мақсатында алдағы 5 жылға шамамен 600 млрд теңгені қарастыру мәселесі пысықталып жатыр. Биыл министрлік жұмыс істеп тұрған зауыттарды жаңарту және жаңа жобалар құруды ынталандыру үшін қаражат бөлу жөніндегі жобаның қаржылық-экономикалық негіздемесін әзірледі. Бюджет қаражатын бөлу туралы тиісті өтініш Қаржы министрлігінде қаралып жатқанын да атап өтті.
Төртіншіден, еліміздің машина жасау өндірісін дамытуда негізгі кедергінің бірі – білікті мамандар жетіспейді. Осыған байланысты министрлік кәсіпорындармен бірлесіп, кадр дайындау бойынша жұмыс жүргізіліп жатқанын хабардар етті. Атап айтқанда, білім беру ұйымдарында теорияны оқытып, зауыттарда практика өткізетін бағдарламалар әзірленіп, қолданысқа енгізіліп жатыр.
«Отандық компаниялар – Кентау трансформатор зауыты, «СарыарқаАвтопром» және Hyundai зауыттары базасында білім беру ұйымдарында теориялық оқытуды және өндірістік практиканы көздейтін дуальды оқыту негізінде оқу мекемелері үшін білім беру бағдарламаларын әзірледі», — деп нақтылады министр.
Сурет: freepik.com
