Биыл Қазақстанда 10 ауыл мен 32 мың адам газбен қамтылады, деп мәлімдеді Энергетика министрлігі. Десе де елде әлі көгілдір отынға қол жеткізе алмай отырған 7 млн адам бар.
Қазір қазақстандықтардың 63,4%-ы (13 миллион адам) газбен қамтылған.
2025 жылы тұрғындарының жалпы саны 354 мың адамды құрайтын 94 ауылға табиғи газ жеткізілді. Биыл газдандыру жұмыстары Ақтөбе, Батыс Қазақстан, Жамбыл, Қарағанды, Қостанай, Қызылорда, Маңғыстау, Түркістан, Ұлытау және Жетісу облыстарында жалғасады.
Көгілдір отынмен қамту жұмыстары Астанада да жалғасып жатыр. Биыл «Шұбар», «Үркер», «Өндіріс», «Пригородный» және «Garden Village» аудандарында газ қосылады.
Газ көлемін арттыру үшін «Бейнеу-Бозой-Шымкент» магистральді газ құбырының екінші желісі салынып жатыр. 2026 жылдың соңына дейін 10 млрд текше метр газ өткізуге мүмкіндік беретін желілік бөліктің құрылысы аяқталмақ, ал екінші кезеңде компрессорлық стансалар салу арқылы өткізу қабілеті 15 млрд текше метрге дейін ұлғайтылады.
Батыс Қазақстан облысының аумағында газдандыру деңгейі 99,8% деп көрсетілгенімен, өңірде көгілдір отынға қол жеткізе алмай отырған 6 ауыл бар.
Айта кетейік, 19 қаңтарда Ақтөбе облысының Хромтау қаласындағы дәмханалардың бірінде газ баллоны жарылып, бес адам жарақат алды. Ал 2025 жылдың желтоқсанында Оралдағы тұрғын үйлердің бірінде газ-ауа қоспасы жарылды.
фото: freepik.com
