19 қаңтарда Ақтөбе облысының Хромтау қаласындағы дәмханалардың бірінде газ баллоны жарылып, бес адам жарақат алды. Бұл туралы облыстық төтенше жағдайлар департаменті хабарлады.
Департамент мәліметінше, көпқабатты үйдің жанында орналасқан дәмханада ыстық сумен жабдықтауға арналған газ-ауа қоспасы жарылған.
Күйік шалған бес адам аудандық ауруханаға жеткізілді. Зардап шеккендер –30-60 жас аралығындағы азаматтар. Облыстық денсаулық сақтау басқармасының мәліметінше, бір науқас жансақтау бөлімінде жатыр, оның денесінің 20%-ы күйген.
Оқиға орнына жеті өрт сөндіруші мен екі өрт сөндіру техникасы жұмылдырылды. Қазір жарылыстың себептері мен мән-жайы анықталып жатыр.
Айта кетейік, 2024 жылдың қаңтар айында Оралдағы дәмханалапдың бірінде газ баллоны жарылып, қайғылы оқиға салдарынан 3 адам көз жұмды.
фото: istockphoto.com
