Жарты жыл ішінде өңірлерден елордаға тұрақты тұру үшін қоныс аударып, тіркелгендердің саны 80,4 мың адамға жетті. Бұл көрсеткіш өткен жылмен салыстырғанда 25%-ға артқан. Бұл туралы Data Hub аналитикалық арнасы жазды.
ҚР СЖРА ҰСБ деректеріне сүйенсек, бұл – кем дегенде соңғы 15 жылдағы ең жоғары абсолютті көрсеткіш.
Қаңтар-маусым айларының қорытындысы бойынша көрсеткіш жаңа межеден асты. Мұндай деңгей бұған дейін тіркелмеген. Айта кетерлігі, өсім жоғары база жағдайында тіркеліп отыр: өткен жылы өңірлерден қоныс аударып, ресми түрде астаналық атанғандардың саны 64,5 мың болып, бірден 75%-ға артқан.
Осылайша Астана екі жыл қатарынан өңірлерден келген мигранттарды Алматыға қарағанда көбірек тартып отыр. Бұған дейінгі жылдары көбіне оңтүстік мегаполис алда болатын.
Назар аудара кетейік, барлық өңірлер ішінде елордаға бағытталған халықтың ең көп кетуі Ақмола облысында байқалды, яғни 14,5 мың адам. Одан кейін Түркістан облысы – 7,9 мың адам. Үшінші орында жоғарыда аталған Алматы – 7 мың адам. Бұл үш өңір бірігіп, Астанаға келген ішкі мигранттардың 37%-ын қамтамасыз етті.
Дегенмен көшіп кеткендер де бар. Қаңтар-маусым аралығында елордалық тіркеуден шығып, өңірлерге тіркелгендер саны 43,6 мың адамды құрады. Олардың басым бөлігі жаңа тұрақты мекенжай ретінде Ақмола облысын (11,5 мың адам), Алматыны (5,7 мың адам) және Түркістан облысын (3,9 мың адам) таңдаған. Бұл жағдайда үш көшбасшы өңірдің жиынтық үлесі 48%-ды құрады.
Нәтижесінде, өңірлерден Астанаға келгендердің таза саны (келгендерден кеткендерді алғанда) 36,8 мың адамды құрады. Бұл да Алматыға қарағанда көп, онда осы көрсеткіш 16,9 мың адамды құрады.
Бір қызықты деректі қоса кетейік: сырттан келген иммигранттар, керісінше, Астанадан гөрі Алматыны таңдайды. Жарты жыл қорытындысы бойынша шетелден елордаға тұрақты тұруға келгендер саны бір мың адам болса, Алматыда бұл көрсеткіш 1,8 мың адамды құрады.
2025 жылдың алғашқы жартыжылдығы Қазақстан аймақтарында демографиялық өзгерістердің әркелкі өрбігенін көрсетті. Ұлттық бірыңғай бюроның соңғы статистикасы халық санының динамикасын ғана емес, ел ішіндегі әлеуметтік-экономикалық ахуалдың қайда бет алғанын да аңғартады.
Сурет: Pixabay.com
