Қарағанды облысында белгісіз ер адамдардың киіктерді далада санитарлық талаптарды сақтамай бөлшектеп жатқан видеолары жарияланды. Бұл туралы «Орда» редакциясына куәгерлер жіберген бейнематериалдан белгілі болды.
Видеода бірнеше азамат сайғақтардың тұтас етін қан мен шаңның ортасында өңдеп жатқанын көруге болады. Кейін олар етті таразыға тартып, жүк көлігіне тиеп әкетті.
Көліктің мемлекеттік нөмірі Батыс Қазақстан облысына тиесілі. Бейнежазбада етті өңдеуге арналған тиісті жағдайлар жоқ, тек далада жаппай сойылған жануарлардың ізі көрінеді.
2025 жылдың шілдесінде мемлекет киіктерді аулауға рұқсат берді. БҚО-ның өзінде 460 мың киік ауланады деп жоспарланды.
Киік етінің келісі Қазақстанның әртүрлі өңірлерінде 1600 теңгеден бастап сатылып жатыр.
