Елде 25 ақпан мен 4 наурыз аралығында құмшекердің орташа бағасы 1,4%-ға өсті. Бұл туралы Data Hub аналитикалық арнасы хабарлады.
Қант бағасы қаңтардың ортасынан бастап өсе бастады. Кейінгі жеті апта қатарынан қымбаттап келеді.
“Бұлай апта сайын қымбаттау үдерісі сирек кездеседі: соңғы рет дәл осындай көрсеткіш 2024 жылдың сәуірінде, ал оған дейін – 2022 жылдың тамызында тіркелген”, — делінген талдауда.
Құмшекердің ең жоғары бағасы Өскемен, Павлодар, Петропавл қалаларында тіркелген, бір аптада +3,4%-ға өскен.
Қазақстанда қанттың басым бөлігі шетелден, негізінен, Ресейден импортталады. 2024 жылы отандық өндірістің үлесі 26% ғана болған. 2023 жылы – республикада 201 мың тонна қант өндірілген, 2022 жылы – 299 мың тонна болған.
2022 жылы елде қант тапшылығы қатты сезілді. Сол кезде отандық өндіріс саласы халық сұранысын қамтуға дәрменсіз екені белгілі болды.
Былтыр қазан айында жаңа қант зауытының жобасы таныстырылған.
